“Ha’u tristi los ohin dader rona Avo Jape mate ho idade 97, durante moris nia sai fonte inspirasaun boot ba timor oan sira, liu-liu kria kondisaun finanseira ba timoroan sira ne’ebé iha estranjeiru, iha prosesu luta ba ukun rasik aan,” dehan nia iha edifisiu Ministeriu Finansas, Aitarak Laran, tersa ne’e (27/09).

Xefi Governu hatutan, hafoin Timor-Leste, restaura nia independensia, matebian Jape Kong Su ho nia oan sira mai Timor-Leste hodi halo investimentu boot hanesan Timor Plaza no loke kampu servisu ba timoroan sira.

“Ita lakon Avo ida ne’ebé durante ne’e fó inspirasaun boot ba timor oan sira katak, o bele ba ne’ebé deit, hetan saida deit, maibe o nia rain ne’e o nunka bele haluha. Tan ne’e espera katak, Avo Jape nia oan sira bele lori nia espiritu ne’e bele hada’et ba timoroan sira hotu, maske sir aba buka moris iha estranjeiru, maibé sira nia hussar talin tara iha Timor-Leste,”haktuir Xefe Governu.

Entretantu, Prezidente Republika José Ramos Horta, mós hato’o sentidu kondolensias ba matebian no familia.

Xefe Estadu mós konsidera Jape Kong Su hanesan emprezariu ida ne’ebé extraordinariu tebes, ne’ebé husik hela ninia rikezas ba povu no nasaun Timor-Leste.

“Ha’u hato’o kondolensia ne’ebé profunda ba familia Jape. Timor-Leste lakon mane ida ne’ebé di’ak liu, emprezario ida ne’ebé extraordinaria. Ninia tinan naruk tebes. Jape Kong Sun nia tinan naruk, nia husik hela ninia rikezas ba povu no nasaun Timor-Leste,”dehan  Xefe Estadu.

tuir informasaun ne’ebé Online INDEPENDENTE asesu, iha pajina ofisial Timor-Plaza Dili Center, relata, mate isin Jape Kong Su, sei lori mai Dili iha loron 06 fulan Outubru 2022.

Matebian Jape Kong Su moris iha loron 01 fulan outubru tinan 1927 no fila hikas ba Na’in nia kadun santu, iha loron 26 Setembru 2022, no mós husik hela nia kaben no oan na’in ualu, hanesan, Julia, Ian, Kenny, Alan, Wendy, Tony, Connie, Danny, no Pamela no nia bei oan sira.