Tuir Prezidente INFORDEPE, Manuel Gomes de Araujo hatete, formasaun bá uza lian portugués agora dadaun lao hela, no hetan kooperasaun husi Institutu Camões.
Ho ida ne’e, INFORDEPE involve ona ema hamutuk 4.300 husi postu administrativu hotu iha teriroriu laran tomak.
“Tinan ida ne’e, ami konsege fó formasaun bá professor sira hamutuk 800 resin iha area oioin, aleinde ida ne’e ami sei fasilita tan formasaun bá professor hamutuk 100 resin iha faze tuir mai,” dehan nia iha salaun João Paulo II, Komoro, kuarta (25/05).
Nia hatutan, formasaun ne’e fahe ba iha area pre-eskolar, ensinu báziku filial, ensinu báziku sentral bá siensia fiziku naturais, matematika, no ensinu sekundária jéral ho tekniku vokasional mak história, geografia, edukasaun no fizika.
Nia haktuir, iha mós formasaun bá professor sira iha nivel A2, B1 no B2, hodi sira bele domina lian portugués atu nune’e, bele fasilita diak liu tan lian portugués iha eskola sira.
Nia akresenta, orsamentu ne’ebé aloka ba iha formasaun refere hamutuk dolar amerikanu rihun $700, ne’ebé fahe ba parte rua hanesan, formasaun akademika ho dolar amerikan rihun $300 resin no formasaun ba professor kontinua sira hamutuk rihun $300 resin.
Entretantu, molok ne’e, Ministru Edukasaun Juventude no Desportu, Armindo Maia, hatete, tuir observasaun MEJD nia durante ne’e, maioria professor sira ne’ebé hanorin iha eskola públiku sira iha teritoriu laran tomak to’o agora seidauk koalia lian portugués ho diak no seidauk halo komunikasaun diak ho alunus sira kona ba lian portugués.
“To’o agora ita nia professor sira limitadu tebes hodi uza lian portugés hodi komunika ba ita nia estudante sira iha prossesu ensinu aprendijazen”.