ICU Movel iha HNGV Seidauk Bele Utiliza Featured

By Adelaide dos Santos Novembru 08, 2023 825
Doutor nain hirak ne'e hamrik hela iha sala ICU Movel, iha HNGV. Foto:Google. Doutor nain hirak ne'e hamrik hela iha sala ICU Movel, iha HNGV. Foto:Google.

DILI: To’o ohin loron parte Óspital Nasional Guído Valadares seidauk utiliza Intensive Care Unit (ICU) movel tanba seidauk halo instalasaun ba oksijeniu sentrál.

Diretor Klínika HNGV, Marcelino Correia hatete, ICU Movel ne'e espesialmente utiliza ba ema ne'ebé ho problema respiratoriu, tanba ne'e presiza instalasaun oksijeniu sentrál, atu nune'e ema ne'ebé ho problema respiratoriu bele ba baixa iha ne'ebá.

“ICU Movel iha HNGV to'o agora ita seidauk utiliza tanba seidauk instala oksijeniu sentrál, tanba ida ne'e kompetensia Ministeriu Saúde nian," dehan nia, iha knar fatin, segunda (06/11).

Molok ICU movel ne'e mai, nia dehan, ema dezeñu ho oksijeniu sentrál, maibé oxijeniu sentrál ne'e presiza orsamentu boot uitoan atu instala tan ne’e to’o ohin seidauk book.

Iha sorin seluk, Xefe Departamentu ICU, Vidal de Jesus informa, ICU movel ne’e seidauk uza tanba sei hein instala oksijeniu sentral.

“To'o oras ne'e seidauk instala ICU movel ne'e, tanba seidauk instala oksijeniu sentral, ne'ebé mak apoiu ba ema ne'ebé atu baixa iha laran,” dehan nia.

Entretantu, HNGV halo lansamentu ba ICU Movel ne’e 9 Fevereriu 2023.

Rate this item
(0 votes)

Independente Digital TV