Fulan Haat Ona Aimoruk Hipertensaun iha Klínika Bairu-Pite Mamuk Featured

By Adelaide dos Santos Novembru 08, 2023 949
Aimoruk Hipertensaun nian.Foto:Google. Aimoruk Hipertensaun nian.Foto:Google.

DILI: Durante fulan haat nia laran, Klinika Bairo-pite hasoru hela problema kona-ba stock aimoruk, liu-liu ba hipertensaun.

Diretór Ezekutivu Klinika Bairo-Pite, Inacio do Santos informa, durante fulan haat ona stock aimoruk ba hipertensaun iha klinika Bairu-pite laiha.

Ho kondisaun ne’e, nia dehan, pesoal saúde sira iha klinika refere pasa reseita ba pasiente sira hodi ba sosa aimoruk iha farmasia sira iha kapital Dili.

"Durante fulan haat ona ita-nia aimoruk ba hipertenseun nian stock laiha. Oinsa ita responde ba pasiente sira? Bainhira ita-nia pasiente sira mai ita-nia pesoal saúde sira fó reseita depois sira ba sosa de'it iha klínika privadu ka farmasia sira," dehan nia iha nia knar-fatin, Segunda (06/11).

Kada fulan, nia hatutan, nia parte hato'o pedidu ba Ministeriu Saúde atu bele hetan apoiu aimoruk, maibé to'o agora seidauk iha resposta.

Husi fulan Agostu to'o Outubru, Klinika Bairu Pite rejista moras hipertensaun na’in 175 ne'ebé afeta ba ema ho idade 70 ba leten.

Iha sorin seluk, Diretór Institutu Nasional Farmasia, Produsaun no Medikamentu (INFPMI), Brigido Dias informa aimoruk hipertensaun hidrochlorothiazide iha INFPM stock mamuk.

“Stock aimoruk hipertensaun hidrochlorothiazide laiha duni iha armajen, maibé ita sei buka meius oinsá mak atu subtitui aimoruk seluk ne'ebé hanesan atu fó ba pasiente sira," dehan nia.

Rate this item
(0 votes)

Independente Digital TV