Tuir Diretór Ezekutivu IADE, Filomeno Marselino Belo, hateten, organizasaun Fokupers hanesan sentru ida ne’ebé apoiu vitima sira, maib’e vitima sira mós merese halo netik buat ruma ba rai ne'e, no sira merese fó kontribuisaun ba rai ne'e liu husi hala'o ekonomia negosiu.

“Ita nia vitima sobrivente sira, bainhira desidi sira nia aan atu sai emprezariu, fatin ida sira ba dahuluk mak iha IADE, ho buat ne'eb’e iha bele fó apoiu ba sira atraves husi apoiu tekniku, no karik possibel bele mós apoiu finanseira, ekipamentus no fasilidade seluk,”dehan nia ba Online INDEPENDENTE, iha salaun Fokupers, kuarta ne’e (19/10).

Nia dehan, bainhira Fokupers halo kooperasaun diak ho IADE no vitima sobrivivente sira hakarak hala'o negosiu, parte IADE prontu koopera ho sira.

"Ami prontu atu koopera ho instituisaun sé deit ne'ebé iha intensaun atu hala'o negosiu bisnis, ami prontu apoiu," nia akresenta.

Nia reforsa, durante ne'e parte IADE apoiu ona sobrivivente barak, aleinde apoiu mós joven sira ne'ebé bele halo konsultasaun sai emprezariál.

“Iha tinan ne'e, ita foku ba joven no sobrivivente sira ne'ebé hakarak sai emprezariu,”nia haktuir.

Entretantu, nia dehan, IADE mós sei fasilita formasaun ba hirak ne’ebé hakarak atu hala’o negosiu no sai emprezariu.

Tan ne’e, nia husu ba emprezariu sira ne’ebé dadauk eziste ona, tenki kontinua hala’o tan trenameitu ba iha área oioin.