PR Horta hatete, nia hasoru malu ho Primeiru Ministru Fiji no Vanuatu, no sira hotu hatudu interese atu mai Timor-Leste iha fulan Novembru nu’udar vizita onra no diplomátika.
“Primeiru Ministru tolu mak konvida atu mai. Sira tinan ida ne'e sira sei mai. Sira kombina tiha ona Primeiru Ministru Xanana, sira mai hanesan konvidadu onra fulan Novembru," informa PR Horta ba jornalista sira hafoin fila husi vizita traballu ba Papua Nova Guine (PNG), iha Aeroportu Internasionál Nicolau Lobato Komoro, Kinta (15/04).
Nia esplika, relasaun Timor-Leste ho estadu Pasífiku sira hanesan Fiji, Vanuatu no Papua Nova Giné sempre forte, tanba apoiu istoriku husi tempu luta ba independénsia.
PR Horta lembra katak, Vanuatu dezde tinan 1981 sempre defende Timor-Leste iha fórum internasionál, enkuantu Fiji no Papua Nova Giné mós kontribui iha operasaun pasifikasaun no treinamentu militar iha tempu rezisténsia.
Durante vizita refere, PR Horta mós partisipa iha Konferénsia Rejionál kona-ba Oseanu iha PNG, ne’ebé fó atensaun ba issu ekonomia azul no mudansa klimátika ne’ebé afeta barak estadu insular sira iha Melanezia
Horta dehan, problema klimátika iha rejiaun ne’e grave tebes, tanba rai balun iha nivel aas de’it metru ida husi tasi, ne’ebé halo sira vulneravel ba subida nivel tasi.
Iha setór saúde, Horta esplika, Timor-Leste iha ona kooperasaun ho PNG no Fiji, inklui programa treinamentu médiku ba Timor-oan sira, no sei tentativa atu aumenta tan programa refere iha futuru.
PR Horta informa mós katak, PNG hatudu interese atu loke embaxada iha TL, no TL mós sei konsidera loke reprezentasaun diplomátika iha PNG.
Relasiona ho ASEAN, PR Horta hatete, embora iha apoiu ba PNG nia aspirasaun atu aproxima ba ASEAN, prosesu ne’e komplikadu tanba regulamentu internu organizasaun nian.
“Ita apoiu sira-nia vontade hakarak tama ASEAN. Maibé ne'e komplikadu uitoan, tanba estatutu karta ASEAN nian hatete membru ida labele parte organizasaun rejionál rua," katak Horta.
Iha parte seluk, Primeiru Ministru, Kay Rala Xanana Gusmão informa, enkontru semanál ho PR Horta hodi kongratula Xefe Estadu tanba vizita diplomátiku ne’ebé konsidera susesu.
“Ha'u kongratula Xefe Estadu tanba nia foin fila husi Papua Nova Giné, nia ba enkontru iha konferénsia Simeira OSEANU, di'ak tebes, la'o kapás tebes,” dehan PM Xanana.
Iha enkontru ne’e, Xanana dehan, PR Horta fó hatene katak lider balun mós hakarak mai Timor-Leste, tanba ne'e Governu sei haree no hili tempu di'ak ruma ba sira-nia vizita iha Novembru ne’e.
