Enkuantu, uma ne’ebé oan-kiak na’in-rua hela, konstrui husi grupu voluntariu ho naran Forum Karidade Úmanitaria Timor-Leste (FKHTL), iha loron 15 fulan-Juñu tinan ne’e.
José Ramos Horta kongratula ba grupu FKHTL ne'ebé hanesan estudantes, maibé iha inisiativa ho voluntarismu hakarak ajuda maluk oan-kiak sira no grupu vulneral.
“Ohin ha’u direitamente hare rasik uma ne'ebé halo husi FKHTL, maske ho orsamentu ne’ebé ki'ik, maibé ho kualidade no sufisiente duni ba familia oan-kiak na’in-rua ne'e bele hela ho seguru”, dehan nia ba jornalista sira, iha Sede Suku Madohi, tersa ohin (13/07).
Tanba ne’e, nia husu ba grupo FKHTL atu hatudu nafatin sira nia karidade, kreatividade, no voluntarismu ba komunidade no soseidade, tanba nasaun iha imi nia liman.
Tuir nia, servisu ne’ebé grupu voluntariu sira halo diak tebes, tanba ne’e lapresiza hein Governu ou Embaixador sira nia ajudus, maibé ho meius ne’ebé grupu voluntariu sira halo, bele hakat ba oin ho susesu.
Entretantu, Prezidente FKHTL, Miguel Hornai, sente apresia no agradese, ohin loron hetan vizita husi Eis-Prezidente Repúblika José Ramos Horta, tanba durante FKHTL eziste iha tinan 2017 seidauk hetan vizita husi Lider Nasional ida. Nune’e, FKHTL sei hakerek istoria ba organizasaun ne’e rasik.
“Hanesan estudantes no voluntarismu husi FKHTL sente orgullu ho buat ne’ebé mai halo, maske halo ho montante osan ne’ebé kiik maibé ami fiar katak diferente kualidade ho instituisaun ho Governu,”dehan Miguel.
Nia hatutan, osan ne’ebé konstrui ba uma oan-kian na’in-rua ne’e hamutuk dolar amerikanu rihun $2,300.
Enkuantu, uma refere ho medida 6×6, iha kuartu 2, sala vizita no sala han 1.
Asistente Editor: Saturnina da Costa
