PR Horta dehan, Fujitivu Filipina ne'e hela iha Timor tinan ida resin ona, no nia kazu ne'e iha ona justisa nia liman, nune'e tempu besik sei iha solusaun.
"Fujitivu Arnolf Teves Jr iha Timor tinan ida resin ona, ha'u espera katak iha tempu badak kazu ne'e sei rezolvidu. Kazu ida ne'e agora dadaun iha justisa nia liman, iha Prokuradór Jerál Repúblika nia liman, no autoridade polísia sira nia liman," dehan PR Horta ba jornalista sira liu husi konferénsia imprensa iha Salaun Palásiu Prezidensiál Bairu-Pite, (27/5).
Antes ne'e, iha loron 21 Maiu 2024, Tribunál liu husi Juiza, Jacinta Correia ne'ebé ka'er kazu Fuzitivu Arnolfo Teves Jr, seidauk bele foti desizaun hodi halo estradisaun ba fuzitivu refere, nune’e bele haruka fila ba nia nasaun orijen Filipina, tanba Tribunál hakarak rona pozisaun fuzitivu nian no haree ba faktu sira tuir konstituisaun no lei kooperasaun internasionál no matéria penal molok halo desizaun.
Tanba ne’e, ekipa konjunta kompostu hosi Departamentu Investigasaun Kriminál, Informasaun Kriminál, Departamentu Departamentu Informasaun Polísia, Unidade Falintil hamutuk ho guarda prizionál Becora ezekuta ordem hosi Supremu Tribunál Justisa hodi lori fuzitivu iha prizaun Becora atu submete ba prosesu audisaun.
Razaun Supremu Tribunál Justisa halo prosesu audisaun ba fuzitivu Arnolfo Teves tanba tuir lei númeru 15/2011 kona-ba Kooperasaun Internasionál Matéria Penál atu aplika estradisaun ba sidadaun estrajeiru ida tenke kumpre faze rua ida mak prosesu administrativu no faze seluk mak prosesu judisiál.
Tuir nia, bainhira faze administrativu, karik Governu deside la admite ou lakonkorda pedidu formál estradisaun ninian, entaun prosesu ne'e bele nulu.
Maibé kuandu Governu dehan katak konkorda ho desizaun pedidu formál hosi Estadu rekrente ninian mak prosesu ne'e tenke mai Supremu Tribunál Justisa nian.
Kazu Arnolfo Teves, Governu deklara ona hodi halo estradisaun ba sidadaun Filipino ne'e hodi haruka fila ba nia nasaun orijen, maibé atu to'o ba faze ne'e, Supremu Trinunal mak deside tuir prosesu judisiál molok haruka Arnolfo Teves Jr ba Filipina.
