Arnolfo nia defeza, José Ximenes, lamenta tebes ho kapturasaun hasoru nia kliente, no deklara katak see de’it mak autoriza kapturasaun ne’e tenke responsabiliza.
“See de'it mak halo autorizasaun ba kapturasaun ida ne'e tenke responsabiliza kriminálmente, ne'e primeiru, tanba sira mós halo kapturasaun ba ami-nia advogadu ida, João Sera, ágora hamutuk ho Señór Teves ho imigrassun,” dehan Defeza ne’e via telefone, Tersa (27/05), kalan.
Tuir defeza, Polisia Imigrasaun bainhira halo kapturasaun la halo koordenasaun ho Diresaun Servisu Investigasaun Kriminál (DSIK) PNTL ne’ebé halo hela seguransa iha Arnolfo nia rezidensia.
Ekipa husi DSIK halo seguransa bazeia ba pedidu husi parte Arnolfo nian.
Defeza ne’e deskonfia, orden kapturasaun ne’e mai husi Ministru Interior.
“Polísia imigrassun kumpre orden Ministru Interiór ne'e mós iIegál, halo detensaun ilegal, no Ministru Interiór tenke responsabiliza ida ne'e, tantu kriminálmente no mós sivilmemte ba dentensaun iIegál ne'e.”
“Señór Teves liu husi ha'u hanesan advogadu iha semana kotuk, depois de desizaun Tribunál Rekursu sai iha loron 22 (Abril), no loron 23 (Abril) ami submete alternativu pedidu adidiu no polítika ka alternativu vistu rezisténsia permanente iha Timor,” dehan nia.
Tan ne’e, nia afirma, kapturasaun ida ne'e nu’udar violasaun grave ba direitu umanus.
Tuir observasaun Jornalista Jornal INDEPENDENTE, hafoin kaptura Arnolfo, autoridade sira lori ba iha edifisiu Ministériu Interior hodi submete ba prosesu investigasaun.
Entretantu, iha 27 Maiu loron, Prezidente Repúblika, José Ramos Horta koalia mós kona-ba Arnolfo ninia kazu.
Tuir Xefe Estadu ne’e, Arnolfo hela iha Timor-Leste tinan ida resin ona no nia kazu ne'e iha ona justisa nia liman, nune'e tempu besik sei iha solusaun.
"Fuzitivu Arnolf Teves Jr. Filipinu ne'ebé iha Timor tinan ida resin ona, ha'u espera katak iha tempu badak kazu ne'e rezolvidu. Ita-boot sira rona tan orsida karik ba kazu ida ne'e. Iha justisa nia liman, iha Prokuradór Jerál Repúblika nia liman, autoridade polísia sira-nia liman," dehan PR Horta liu husi konferénsia imprensa, iha salaun Palásiu Prezidensiál Bairu-Pite, Tersa (27/05).
