"Ha'u kontinua defende ida ne'e, joven sira bele ba servisu iha liur, la'ós tanba manán osan, maibé ba liur aprende buat barak hanesan eskola ida, tinan lima ka tinan sanulu iha liur sira fila mai nia mentalidade oin seluk ona, " dehan Prezidente Repúblika José Manuel Ramos Horta ba jornalista sira hafoin akomapaña Prezidente Portugál iha Aeroportu Internasionál Nicolão Lobato Komoro, (22/05).
Nia dehan, agora kontatu dadaun ona nasaun Alemaña ho Repúblika Irlanda atu haruka jovem sira ba servisu iha ne'ebá.
"Ha'u agora kontatu dadaun ona Alemaña ho Repúblika Irlanda, liu-liu ho Alemaña atu hare sira bele fó kontratu atu Timor oan ba servisu iha Alemaña. Purtantu ha'u iha relasaun di'ak ho Governu foun iha ne'ebá, ho Prezidente ha'u ko'alia ona ho sira. Sira agora hare dadaun semana ruma nia laran bele iha informasaun konkreta ruma," hatete nia.
Entretantu, Agonstinho Alves de Oliveira komunidade husi Munisípiu Baukau, Postu Administrativu Baguia ne'ebé asiste komemorasaun loron restaurasaun indepedénsia ba dala 20 iha Palasiu Prezidensiál Bairu-Pite husu Prezidente Repúblika, José Manuel Ramos Horta tenke kumpri promesa ne’ebé hato’o durante iha kampaña eleitorál, liu-liu kona ba atu sei haruka joven sira ba servisu iha rai liur.
"Prezidente Repúblika, José Manuel Ramos Horta tenke kumpri ninia promesa eleitorál katak, sei haruka joven sira ba buka osan iha rai liur, ida ne'e ami kontente. Maibé, labele ko'alia de'it mais tenke realiza," tenik nia.
