Situasaun enjerál iha HNGV liu-liu iha banku urjénsia, pasiente nafatin mai ho númeru aas, ne’ebé iha oras 24 nia laran de’it pasiente hamutuk na’in 150 mak asesu, ne’ebé maioria mai ho kazu dengue.

“Ita haree Hospitál nafatin iha limitasaun nia laran atu baixa pasiente sira ne’e, maibé ita esforsu atu pasiente sira ne’ebé mak persija alta ona ita tenke haruka alta duni atu fó fali fatin ba sira seluk,” nia hateten iha knaar fatin, HNGV, Sesta (18/02).

Orientasaun kontinua la’o atu médiku sira kontinua halo kontrolu ba pasiente sira iha OPD no Amulatóriu, la husik leet, hodi responde ba situasaun over load iha Hospitál Nasionál rasik.

Tanba kazu dengue ne’e kontinua sa’e, HNGV prepara fatin balun husik mamuk hanesan unidade sururjiaun, unidade kardiolojia husik mamuk, nune’e bainhira pasiente sira baixa nakonu ona iha pediatria bele muda ba fatin sira ne’e.

Kona-bá médiku na’in 30 ne’ebé antes MS atu rekruta, daudaun ne’e na’in 25 mak aloka ona ba HNGV hodi responde ba kazu outbreak dengue, no aumenta tan ba departamentu ne’ebé sei menus hela médiku, maibé barak liu foku mai iha pediatria no emerjénsia.

Ho rekursu sira ne’e, konsidera seidauk sufisiente nafatin atu rezolve problema sira ne’e, maibé espera ho sira nia apoiu ne’e minimu bele responde ona ba sitausaun ne’ebé daudaun HNGV enfrenta.