"Iha Vizita ne'e, sei koalia asunto barak tebes, hanesan relasaun bilateral, defeza seguransa, relasaun maritima, trabalhador ba australia, asunto edukasaun, saúde, no seluk Tan", dehan Xefe Estadu, bainhira partisipa serimónia resepsaun no selebrasaun liturjia da palavra iha Igrjea Parókia Imaculada da Conceição Katedrál, Villa Verde, segunda ne’e (05/09).
Xefe Estadu ne’e hatutan, Austrália ho Timor-Leste hanesan nasaun viziñu no amigu.
Nune’e, vizita ida-ne’e mós hanesan, oportunidade ida hodi haforsa parseria entre nasaun rua ne’e no explora dalan ba kooperasaun dezenvolvimentu ekonómika, seguransa no defeza, edukasaun, mobilidade traballadór no inisiativa rejionál.
Enkuantu, Xefe Estadu sei hala’o vizita Estadu iha Canberra, Sydney no Darwin.
Ho nune’e, iha Canberra, sei hasoru malu ho Governadór Jerál Austrália, Primeiru-Ministru Austrália, Anthony Albanese no Ministra Negósiu Estranjeiru, Penny Wong.
Iha vizite ne’e, Xefe Estadu mós sei halo intervensaun iha nasionál Press Club no halo mós vizita ba ospitál Royal Darwin Hospital, Menzies School of Health Research, National Critical Care Centre and LNG facilities, inklui ajenda sira seluk.
Entretantu, molok ne'e, hafoin simu pose iha loron 20 maiu 2022, PR José Ramos Horta, halo ona vizita ba estranjeiru, dahuluk ba iha Indonézia no vizita daruak mak ohin ba iha Austrália.
Enkuantu, Prezidente Republika José Ramos Horta ho delegasaun hanesan, Ministru Defeza Filomino Paixão no mós Komodoro Pedro Klamar Fuik, desloka ba Australia iha tuku 03:00 lokraik, oras TL, ho Aviuan Qantas Australia. Iha vizita Estadu ba Australia ne'e, hahú iha loron 6 to'o 11 Setembru tinan ne’e.
Tuir informasaun, Xefe Estadu sei fila mai Timor-Leste iha loron 12 fulan-Setembru tinan ne’e.
Iha ambitu deslokasaun Prezidente Republika, iha Aeroportu Internasional Nikolau Lobatu Komoro, akompaña husi Primeiru Ministru Taur Matan Ruak no mós membru Governu balun.
Nune’e, tuir planu, iha loron 21-30 setembru, Xefe Estadu sei hala’o vizita Estadu ba Estadu Unidu Amérika (EUA) hodi parsitipa sesaun asembleia jerál Nasaun Unida nian iha Nova Iorke.
