Han Paun, Ema ida Mate Na’in Rua Grave iha Lospalos Featured

By Dezembru 14, 2018 2992
paun masin Dili paun masin Dili

DILI: Labarik ho idade tinan rua-resin mate iha Munisípiu Lautem, Postu Administrativu Lospalos, Suku Bauro, Aldeia Sepelata, hafoin konsumu paun, iha Tersa (11/12).

Tuir informasaun ne’ebé rekolla husi família, matebian Carla Cinta da Costa ho ninia família sira konsumu paun ne’ebé ninia aman sosa iha Terminál Bekora, bainhira atu halo viajen husi Dili ba Lospalos, iha Segunda (10/12).

 

Hafoin han hotu paun ne’e matebian ho sira ne’ebé konsumu paun ne’e sente ulun moras, bulelu, laran sa'e no balun muta.

Matebian rasik la konsege lori ba ospitál tanba mate kedas iha fatin. Nune’e, vítima rua seluk ne’ebé hetan efeitu husi han paun ne’e lori duni ba ospitál hodi halo tratamentu, no mós kontinua transporta ba ospitál Referénsia Baukau.

Aleinde vítima sira ne’e, iha mós pasiente na’in hitu seluk ne’ebé hasoru problema hanesan, maski nune’e vítima sira seluk halo de’it observasaun iha ospitál no haruka fila kedas tanba kondisaun la grave.

“Vítima hamutuk na’in sanulu. Na’in hitu alta no na’in rua maka ami haruka ba Ospitál Referénsia Baukau tanba sira nia kondisaun grave no mós ida maka mate”, dehan Xefe Saúde Internamentu Lospalos, Justino dos Santos, via telefone, horisehik.

Entretantu, mate isin haruka ona mai Dili hodi halo autópsia atu bele identifika loloos kauza husi mate ne’e.

La’ós ne’e de’it, parte ospitál mós rekolla ona dadus balun hanesan paun rohan inklui mós evidénsia sira seluk hodi halo teste iha laboratóriu.

Rate this item
(0 votes)
Last modified on Segunda, 17 Dezembru 2018 17:34

Independente Digital TV