Sonia Soares husi Grupo Tres Familias, sente kontente tebes tanba ai-hán lokál ne'ebé nia fa’an bele hetan rendementu di'ak.
“Ha’u kontente halo negosiu faan aihan lokal iha feira ne’e, tanba rendementu ne’eb’e ha’u hetan kada loron bele hetan $100,”dehan nia iha Aldeia Darsula, domingu horseik (28/11). Nia haktuir, aihan lokal ne’ebé nia faan mak hanesan, aifarina daan, fehuk daan no kulu daan, nune’e kada loron nia hetan dolar amerikanu $100, kompara ho loron babain.
Nia akresenta, baibain hatama kripik kuaze 50 to’o 100 bunkus ba loja, maibé to’o semana tolu ka fulan ida mak foin bele hetan osan, maibé ida ne’e kada loron hetan $100.
Iha fatin hanesan, Grupu Negosiu fitun Tais, Lucia Ximenes informa, durante feira sente kontente tebes, tanba vizitante barak mak sosa sira-nia produtu.
"Durante feira ne'e ha'u sente kontente tebes, tanba ami mós iha produtu oituan, hanesan dader, meudia, lokraik ema vizitante sira mós mai barak sosa ami nia korenti, brinkus sira ne'ebé halo husi tais, ne'ebé ha'u sente kontente tebe-tebes".
Nia hatutan, iha loron baibain antes feira ne’e iha, sira faan iha sira nia fatin deit no laiha vizintante ida mak atu ba sosa sira nia produtu ne’e.
Nia esplika, ninia produtu kona ba korenti tradisional ne’ebé halo ho tais sira faan ho folin dolar amerikanu $10 kada korenti ida, nune’e dala ruma sira faan husi dader to’o lokraik sira hetan $40 bele to’o mós $50.
Nia akresenta, ba futuru Governu tenki kontinua loke nafatin feira hanesan ne'e, nune'e bele promove sira nia produtu refere.
Negosiante Joaninha da Costa hatete, iha feira ne’ebé loke hodi selebra loron proklamasaun independensia ba dala-46, ida ne’e lori benefísiu ba sira, tanba kada loron vizitante sosa sira nia produtu, bele hetan rendementu to’o dolar amerikanu $150.
Entretantu, feira ne'e loke durante loron 7, husi 22 to'o 28 fulan-Novembru hodi selebra loron Proklamasaun Independénsia ba dala-46, ne'ebé realiza iha Aldeia Darasula, Suku Gariwai, Postu Administrativu Baukau Vila, Munisipiu Baukau.
Asistente Editor: Saturnina da Costa
