Tuir Xefe Suku Nunira, Postu Administrativu Baukau Vila, Munisipiu Baukau, Nilton de Souza Gama hatete, iha suku refere komunidade iha aldeia lima mak seidauk asesu ba bee moos tanba makina ne’ebé uza dada bee avaria hela durante tinan rua ona no mós impaktu husi mudansa klimatika halo bee maran.

“Ha’u-nia suku tinan rua la asesu bee moos tanba mákina bomba bee mak tohar, entaun agora atu troka mákina refere tenke sosa iha rai-li’ur, ida ne’e prosesu sei kleur,”dehan nia ba jornalista sira iha ambítu selebrasaun loron proklamasaun ba dala-46, iha Aldeia Darsula, Suku Gariwai, Postu Administrativu Baukau Vila, Munisipiu Baukau, domingo horseik (28/11).

Nia hatutan, komunidade sira iha tempu bailoron obriga tenki lao ain, kuaze kilomentru rua hafoin kuru bee mos hodi consume.

 Nia haktuir, kona ba bee moos, bainhira makina bee nian avaria, ida ne’e afeita mós ba natar hektares 177 konsege mak abandona. Nune’e prekupasaun ne’e autoridade sira hato’o ona ba Instituto Petróleu no Jeolójia (IPG-Sigla Portugués) hodi halo perfurasaun maibé sei iha prosesu.

Nune’e, Xefe Suku mós hato’o ona proposta ba parte relevante sira, atu bele haree oinsa resolve lalais problema bee moos ba komunidade sira, maibé proposta ne’e rasik seidauk hetan aprovasaun.

Tanba ne’e, nia husu ba Governu atu resolve prekupasaun komunidade sira nian ho urjensia.

Enkuantu, iha Suku Nunira iha Aldeia lima mak hanesan, Aldeia Lalulai, Aldeia Buskuolari, Aldeia Wasilawa, Aldeia Loilaco no Aldeia Borulau, ho total populasaun hamutuk 2.259 ho total uma kain hamutuk 79.

Iha fatin hanesan, Xefe Suku Baguia, Hermenegildo, hatete, iha suku refere, komunidade iha Aldeia tolu hanesan, Aldeia Butileo, Aldeia Lauana-Liu no Aldeia Saraida ho total populasaun hamutuk 1.579 no total uma kain 360 mak seidauk asesu ba bee moos.

“Ita-nia preokupasaun sira-ne’e hato’o dala barak ona ba parte relevante maibé to’o agora seidauk iha reposta ruma, tanba ne’e espera ita-nia Governu bele atende lalais tanba bee-moos importante ba ema-nia moris,”nia akresenta.

Entretantu, Xefe Suku Buibau, Francisco Ximenes, hatete, Timor-Leste hetan independensia tinan barak ona maibé dezenvolvimentu suku sei hakdasak.

Tuir nia, sente kontente tebes tanba tinan ne’e Governu deside komemora loron proklamasaun indepedénsia ba dala-46 iha Baukau.

“Ita iha hetan ona indepedénsia tinan barak ona maibé dezenvolvimentu suku nian mak seidauk la’o, liuliu kona-ba bee-moos nian, estrada no irigasaun seidauk la’o,” dehan nia.

Nia esplika, iha Suku Buibau, iha Aldeia lima hanesan, Aldeia Alala, Builai, Manulai, Samalari laculiba no Buibau mak asesu ona bee moos, ida ne’eb’e seidauk mak Aldeia Loidua. Total populasaun iha suku refere hamutuk 5.275 no uma kain hamutuk 1.000.

Asistente Editor: Saturnina da Costa