Sekretáriu Estadu Komunikasaun Sosiál (SEKomS), Expedito Loro Dias Ximenes hatete, daudaun ne'e governu hanoin hela atu halo estudu viabilidade ba kontrusaun foun edifísiu andar tolu ne’ebé sei harii iha rai estadu ne’ebé lokaliza iha area Aimutin.
“Daudaun ne'e governu hanoin hela atu halo estudu viabilidade, edifísiu andar tolu neʼebé kompostu husi andar ida ba edifísiu RTTL, EP, maibé tanba sira-nia edifísiu iha ona entaun sira iha ona hanoin atu halo fali fatin auditória ba atividade reuniaun.Andar ida ba Agência Tatoli, no ida seluk ba asosiasaun jornalista sira," informa Sekretáriu Estadu, iha salaun enkontru Konsellu Imprensa, Kintal Boot, Tersa (13/01).
Expedito hatete, governu nafatin fó apoiu ba asosiasaun jornalista sira, maibé sei bazeia ba sira-nia programa prioridade iha organizasaun ka problema média nian ne'ebé akontese.
"Asosiasaun mós ami nafatin fó apoiu maibé apoiu neʼebé atu fó iha tinan 2026 ne'e oin seluk uitoan, maske sei nafatin bazeia ba sira-nia proposta maibé tenke bazeia liu ba programa no mós issu ka problema media ne'ebé akontese," nia esplika.
Tanba ne'e, nia dehan, liu-liu ho avansa teknolojia ka prezensa artifisiál intelijensia (AI), governu presiza prepara joven sira atu halo komparasaun uza media sosiál ho respondabilidade no saudavel.
"Haree ba avansu teknolojia no prezensa artifisiál intelejénsia ne'e presiza atu bele prepara joven sira futuru nasaun nian, atu bele uza média sosiál ne'e ho responsabilidade no saudavél, tanba ne'e mak organizasaun jornalista sira ne'e ami fó nafatin apoiu," katak Expedito.
Iha fatin hanesan, Prezidente Asosiasaun Timor-Leste Press Union (TLPU), Cândido Alves, husu ba governu atu harii edifisiu ida ba Asosiasaun Jornalista sira, tanba asosiasaun jornalista iha Timor-Leste laiha kbiit atu harii edifisiu rasik.
"Ita sempre husu ba ukun-na'in sira atu tau atensaun no harii uma ba asosiasaun sira, la'ós de'it ba TLPU maibé ba asosiasaun jornalista hotu.Bainhira laiha fatin, ita susar atu halibur jornalista sira," dehan Cândido.
Dadaun ne'e, nia hatutan, TLPU provizoriamente uza sede veteranus iha Taibesi, no bainhira ema uza fali, TLPU tenke sai husi ne'ebá.
