Sexta, 24 Setembru 2021 | Login
Reuniaun Governu ho parseiru internasional sira, iha sala Ministeriu Finansa, Aitarak Laran Dili, sesta (30/4). Foto Camilio de Sousa/Independente Reuniaun Governu ho parseiru internasional sira, iha sala Ministeriu Finansa, Aitarak Laran Dili, sesta (30/4). Foto Camilio de Sousa/Independente

Governu Kontinua Presiza Apoiu Internasionál Rejolve Vitima Inundasaun Featured

DILI:Governu liuhosi Ministériu Negosiu Estranjeiru no Koperasaun (MNEK) hamutuk ho Ministériu Finansas (MF) halo ona exersiu ida oinsa parseiru internasionál sira iha Timor-Leste bele kontinua apoiu vitima inundasaun no halo prevensaun Covid-19.

Ministra Negosio Estranjeiru no Koperasaun, Adaljiza Albertina Xavier Reis Magno hatete, Timor-Leste agora dadaun infrenta hela situasaun kalamidade ne’ebé defisil hanesan Covid-19 kazu positivu kada loron aumenta.

“Bainhira akontese inundasaun iha loron 4 fulan-Abril, Konsellu Ministru realiza kedan inkontru extraordinaria iha loron 5 fulan-Abril hodi deside husu apoiu solidaridade internasionál durante loron 30 no agora dadaun sei lao hela no sei kontinua aplika loron 30 tan ba etapa daruak nian,”dehan nia iha Ministériu Finansas, Aitarak-Laran, Dili, (30/04).

Enkontru ida ne’e realiza husi Ministeriu Finansas, MNEK no SEPS hodi bolu parseiru dezenvolvimentu sira iha Timor-Leste hodi avalia konaba ajudus sira ne’ebé foin dadauk parseiru internasionál sira apoia mai Timor-Leste  hodi  ajuda ba komunidade afetadu husi inundasaun no mós kombate prevensaun Covid-19.

“Ita presija avalia apoiu asisténsia umanitaria husi ita nia parseiru  internasional sira hodi relata relatoriu ba sira no kontinua husu nafatin apiou adisionál sira ba futuru saida mak sira bele ajuda Timor-Leste,”tenik nia.

Adijiza reafirma katak, kona-ba apiou adisionál ne’ebé Governu Timor-Leste propoin la obriga, maibé depende ba sira nia Governu, enkuantu kona-ba exersiu ida ne’e Ministru Finansas mak sei prepara.

Iha fatin hanesan, Ministru Finansas, Rui Gomes husu nafatin apoiu internasionál atu Timor-Leste bele rekopera fali ekonomia povu nasaun nian.

“Ha’u halo proposta lubuk ida hodi hato’o ba ita-nia parseiru dezenvolvimentu internasionál kona-ba rekoperasaun ekonomia no rehabilita fali konstrusaun públiku sira ne’ebé hetan estragus husi inundasaun.

Rui hatutan, proposta sira ne’e Ministériu Finansas sei submete ba reprezentante Embaixada sira no Ajensia Internasional iha Timor-Leste hodi hatutan ba sira-nia Governu depende saida mak sira atu apoiu mai Timor-Leste.

Reprezentante Residensia ONU nian Roy Trivedy iha nia intervensaun hateten, Ajensia ONU iha Timor-Leste iha komitmentu nafatin hodi fó apoiu kualker saida mak Governu Timor-Leste husu.

Ajensia ONU liuhosi Milineum Cooperation Chalenge (MCC) sei fó doasaun ba Governu Timor-Leste hodi halo konstrusaun drainajen iha Dili bazea ba proposta ne’ebé Governu husu.

Embaxadór Amerika, Kevin Blackstone hateten Governu Amerika sei fó vasinasaun ba Timor-Leste iha tempu badak.

Aleinde Embaxador Australia, Piter Robert no Embaxador Nova Zelandia Philip Hewitt informa katak, Governu Australia no Governu Nova Zelandia prontu nafatin ajuda Timor-Leste iha kualker tempu bainhira Governu Timor-Leste presija.

Iha biban ne’e, parseiru dezenvolvimentu internasional sira iha Timor-Leste aseita kona-ba proposta ne’ebé Ministériu Finansas hato’o ba sira.

Nune’e Sekretaria Estadu Protesaun Sivil (SEPS), Joaquim dos Reis Martins agradese ba doasaun no ajudus umanitaria husi parseiru sira.

 

Jornalista: Camilio de Sousa

Editor: Jose Sarito Amaral

Read 1390 times Last modified on Sábadu, 01 Maiu 2021 13:06
Rate this item
(0 votes)