Arkedioseze Metropolitana Dili Deside Suspende Misa Featured

By Saturnina da Costa Maiu 01, 2021 516
Arkedioseze Metropolitana Dili Don. Virgilio do Carmo. Arkedioseze Metropolitana Dili Don. Virgilio do Carmo.

DILI:Foin semana ida liu hala’o misa multiplika, Arkedioseze Metropolitana Dili Don. Virgilio do Carmo tenki deside fali suspende atividade misa ne’e, relasiona ho desizaun Konsellu Ministru, ne’ebé reativa hikás konfinamentu domisiliariu jerál iha kapita Dili.

Don.Virgilio konsidera deklarasaun Governu nian Nº.14/2021 de 29 de

Abril, kona-ba Estado Emerjensia XIII no rezulusaun Governu Nº .45/2021, 46,49, 50 de 29 de abril kona-ba, extende serka sanitaria no konfinamentu domisiliariu jerál iha Munisipiu Ainaro, Dili, Covalima, Baucau, Vikeke no Ermera.

Rezulusaun Governu, Nº .53/2021 de 29 abril aplika mós impozisaun serka sanitária iha munisipiu Likisa, Manufahi no Lautem.

“Ho ida ne'e, ha'u komunika ba Parokia, Relijiozos, Relijiozas no saranii sira hotu, atu supende selebrasaun misa iha públiku no sakramentu sira iha vigaria Dili to’o iha desizaun Governu nian koba-ba rezulusaun Governu aliña 10, 45/2021 kona-ba extensaun konfinamentu obrigatoriu hahú iha oras 00:00 loron 30 fulan-maio ne’ebé sei termina iha loron 13 fulan-maio oras 23:59,”dehan Don.Virgilio iha komunikadu ne’ebé Online INDEPENDENTE asesu, sesta ne’e (30/04).

Arkedioseze hatutan, selebrasaun misa no sakramentu sira ba publiku kontinua  lao hanesan babain ba vigaria sira ne’ebé la implementa serka sanitária, hanesan, Aileu, Oecuse, Manatuto no Bobonaro.

Nune’e mós serimonia fúnebre sira nafatin tuir orientasaun rezulusaun Governu nian aliña 20, Nº.45/2021.

Entretantu, Don. Virgilio husu ba sarani no familia sira hotu iha vigaria Dili durante iha fulan-maiu nia laran hanesan fulan-Rosário atu reza tersu iha uma de’it, sei laiha prusisaun, maibé ba Vigaria sira seluk hala’o tuir tradisaun.

Fó hanoin ba sarani hotu atu kumpre nafatin medida preventiva: usa máskara, fase liman ho sabaun/hand sanitizer no distansiamentu sosial ho finalidade atu garante saúde diak ba ema hotu.

“Ha'u hato’o obrigado wain ba kompreensaun no kolaborasaun, ita Inan Lalehan, Maria Virgem, sei hamutuk ho ita no hamahan ita hotu. Ha'u nia bênsaun ba imi hotu,”tenik nia.

 

Jornalista: Saturnina da Costa

Editor: Jose Sarito Amaral

Rate this item
(0 votes)
Last modified on Sábadu, 01 Maiu 2021 15:28

Independente Digital TV