"Lori povu Timor-Leste nia naran, Governu hato’o kondolénsia ba família no belun vítima sira inundasaun nian ne’ebé kauza husi udan forte liu ne’ebé afeta ona Seul, kapitál Koreia Súl nian, hanesan akontese iha tinan 80 liu bá", dehan Ministru Prezidensia Konsellu Ministru, Fidelis Leite Magahaes Liu Komunikadu ne'ebe Online INDEPENDENTE asesu, kuarta ne'e (10/08)
Inundasaun ne’e mosu impaktu husi udan iha segunda-feira kalan boot, oras lokál, udan komesa boot ona, iha Seul no iha sidade viziña sira, rezulta ema mate pelumenus na’in-ualu no ema atus ba atus maka tenke evakua.
"Udan ne’ebé makas tebes halo estragu barak materiál sira, hanesan edifísiu, veíkulu, estrada no infraestrutura sira seluk, provoka mós rai-halai no obriga tenke taka ahi elétriku no suspende servisu komboiu no metro nian", nia dehan.
Ho nune'e, Ministru Fidelis leite Magahaes lori Governu tomak nia naran, hato’o katak “ami-nia sentidu kondolénsia ne’ebé kle’an ba família sira ne’ebé lakon sira-nia ema ne’ebé sira hadomi",
"Iha loron difisil sira-ne’e, Timor-Leste hato’o ninia solidariedade ba Governu no populasaun tomak Repúblika Koreia nian”, tenik fidelis
Enkuantu Vítima ne’ebé lakon vida ka mate iha inundasaun ne’ebé akontese iha Korea du Súl to’o iha loron Kuarta ne'e (10/08) aumenta ona bá na’in-sia (9).
Aliende Vítima na’in-sia (9) ne’ebé lakon vida ne’e kompostu husi na’in-lima (5) iha sidade Seoul, na’in-tolu (3) iha Provínsia Gyeonggi no na’in-ida (1) iha Provínsia Gongwon, Korea du Súl.
Entretantu vítima kanek hamutuk na’in-sia (9) no na’in-neen (6) lakon to’o agora buka seidauk hetan. Inundasaun ne’e mós rezulta kortés liña eletrisidade no obriga ema ua’in tenke evakua bá fatin seguru.
Ho nune'e udan ho intensidade maka’as akontese iha Korea du Súl inklui sidade Seoul dezde Segunda (08/08). Udan been to’o 100 milímetru kada oras. Ne’e hanesan udan boot liu ona dezde tinan 80 nia laran ikus ne’e.
Udan been kada oras iha Distritu Dongjak, Seoul, boot liu 141,5 milímetru iha pontu dahuluk. Númeru ne’e hanesan udan ho intensidade maka’as no boot akontese iha Korea du Súl desde kedas tinan 1942 liubá.
