Tuir dadus estudante sira ne’ebé hela iha kos iha Dili hamutuk 5.586. Husi total fós ne'ebe iha, sei distribui ba estudante IOB hamutuk saka 726, UNPAZ saka 1510, DIT saka 373 no Cristal saka 84.

Hafoin simbolikamente entrega fós ba reprejentante estudante iha universidade, Vise Primeru Ministra Armanda Berta dos Santos hateten, subsidiu fós ba estudente sira ne’ebé hela iha kos sira hotu iha Dili laran tomak  bazea ba dadus.

Tuir Armanda katak, Governu sei la husik nia povu hamlaha no subsidi ida ne’e Governu sei fó ba estudante sira tanba estudante sira labele hetan movimentu ba Munisipiu sira hodi foti aihan relasiona  ho serka sanitária iha Munisipiu Dili, Munisipiu Baukau no Vikeke.

"Governu sei fasilita estudante hotu-hotu ne’ebé hela iha kos, total estudante ne’ebé sei simu fós  hamutuk 5.586, dadus ida ne’e ita asesu husi Universidade sira atraves liuhusi Ministériu Siensia Edukasaun e Cultura no ohin loron 21 de Marsu Ministériu Sosial Solidaridade no Inkluzaun (MSSI) realiza programa fahe subsidiu foos ida ne’e,"dehan Vise Ministra Berta iha DIT, ba Jornalista Online Independente Domingu ohin.

Iha oportunidade ida ne’e, Vise Primeru Ministru ne’e fó agradesementu klean ba Retór Universidade hotu-hotu liuliu Retór DIT ne’ebé bele kolabora di’ak ho Ministériu Siensia Edukasaun no Cultura  hodi fornese dadus estudante sira hodi nunee programa distribuisaun fós bele realiza ho lalais.

Iha Fatin hanesan, Retór DIT, Alvaro Menezes agradese ba Governu liuhusi Vise Primiru Ministru ne’ebé halo intervensaun ho fasil no lalais no fós hirak ne’e parte universidade sira sei fornese ba nia estudante sira iha kos bazea ba dadus  ne’ebé universidade ida-idak aprejenta.

Retór Alvaro mós rekomenda ba Ministériu Siensia Edukasaun no Cultura, atu fornese mós internet gratuitu ba estudante atu nunee bele hala’o prosesu aprezinjajen liuhosi online.

Sermonia entrega fós, hetan partisipasaun husi Vise Primera Ministra Armanda Berta dos Santos, Ministru Siensia Edukasaun no Kultura, Longinhos dos Santos, Vise Ministra MSSI, Siti Chandra Wati Verdial no komitiva tomak.

Molok ne’e, Prezidente Centru Lojistika Nasionál (CLN), Augusto Junior Trindade mós informa katak prontu distribui fós ba estudante sira iha kos Dili depende kordenasaun ministerial entre Ministériu Solidariedade Sosiál no Inkluzaun (MSSI) ho Ministériu Ensinu Superior Siensia Kultura (MESSK).

Tanba tuir Junior katak, iha dalan rua atu normaliza situasaun ne’ebé povu enfrenta iha serka sanitária. Primeiru Governu halo intervensaun iha merkadu hodi normaliza presu no segundu, hala’o apoiu umanitariu ba povu sira ne’ebé presiza aihan.

Aliende apoiu Governu ne’e, ekipa solidariedade husi grupu balun hanesan Lautem Oan Tané Malu mós hala’o atividade umanitaria fornese fós ba estudante sira iha Dili. Nomos grupu sira seluk ho volutariamente apoiu fós ba estudante sira ou apoiu ba ema ne’ebé presiza aihan iha Dili, relasiona ho serka sanitária.