Desizaun ida ne’e foti hafoin protestu husi kadetes foun no estudante sira ne’ebé ezije ba Ministériu Interiór atu anula totál prosesu rekrutamentu ne’ebé konsidera la transparente.
PM Xanana hatete, bazeia ba rekomendasaun polisia sira husi Austrália no Portugál, no envolve mós sosiédade sivil katak di’ak liu arkiva prosesu ne’ebé halo ona no loke fila fali prosesu foun.
“Rekomendasaun husi polísia ne'ebé mai husi Austrália, Portugál sira dehan di'ak liu loke fila fali, buat ida uluk ne'e arkiva tiha, loke fila fali,” dehan PM Xanana hafoin enkontru semanál ho PR Horta iha Palásiu Prezidensiál Bairu-Pite, Kinta (19/03).
Tuir PM Xanana, mekanismu rekrutamentu foun sei organiza iha faze tolu atu garante transparénsia no justisa ba kandidatu hotu-hotu.
Faze dahuluk halo selesaun inisial ba kandidatu hotu. Faze daruak mak filtrasaun kandidatu ne’ebé pasa faze dahuluk. Faze datoluk mak selesaun final.
“Ami deside ona ida ne'e, ohin ha'u mai informa ba Prezidente Repúblika," dehan PM Xanana.
Molok ne’e, iha 18 Marsu 2026, Estudante Universitáriu Timor-Leste (EUTL) hamutuk ho kadetes PNTL halo manifestasaun iha Universidade Nasional Timor Lorosa'e (UNTL), liu-liu iha Fakuldade Siénsia Polítika no Sosiais (FASPOL), Kaikoli.
Manifestante sira ezije anulasaun totál prosesu rekrutamentu, investiga alegasaun nepotizmu, no reforma sistema seleksaun PNTL
Protestu ne’e ba loron datoluk remata ho konfrontu ho autoridade sira, ne’ebé rezulta ema na’in hitu (7) kanek.
