Nia dehan, kona-ba Austrália nia apoiu orsamentu direta,  adisionál dólar australianu millaun $20 ka aproximadamente dólar amerikanu millaun U$13 ba tinan 2023.

“"Hau atu anunsia iha nee katak, Governu Australia sei apoiu orsamentu dolar australianu hamutuk tokon $20 ka aproximadamente dólar amerikanu tokon U$13 ne’e, Governu Timor-Leste uza hodi finansia ba implementasaun Programa Nasional Dezenvolvimentu Suku (PNDS) inklui programa mobilidade laboral, no rekuperasaun ekonómiku,”dehan Komunkadu ne’ebé Online INDEPENDENTE asesu, sabado ne’e (03/09).

Ho nune’e, orsamentu ba programa rekuperasaun ekonomia liu husi programa Bolsa da Mãe Jerasaun Foun (BdMJF), ho montante dólar australianu millaun $10.

 Enkuantu, programa asistensia sosiál ne’e nia objetivu mak atu redús malnutrisaun no pobreza iha Timor-Leste ho nia alvu prinsipál mak inan isin-rua no bebé foin moris to’o tinan rua

Aleinde ne’e, dólar australianu millaun $7 sei aloka ba Programa Nasionál Dezenvolvimentu Suku (PNDS) hodi uza ba harii infraestrutura bázika iha Suku sira hanesan klínika saúde, estrada, ponte, bee mo’os, drenajen no irrigasaun.

Orsamentu dólar australianu millaun $1,3 sei aloka ba Programa Mobilidade Laborál liu husi hasa’e númeru traballadór Timoroan sira ne’ebé sei ba servisu iha Austrália no apoiu kontínua ba traballadór sira ne’ebé fila fali ona mai Timor-Leste.

Molok ne’e, iha tinan 2020, Timor-Leste no Austrália asina ona Akordu Apoiu Orsamentu Direta Faze Dahuluk ho montante dólar australianu millaun $7 ba Programa PNDS.

Iha fulan-juñu 2021, Ministru Finansas, Rui Augusto Gomes no reprezentante Embaixada Austrália asina mós Akordu Apoiu Orsamentu Direta Faze Daruak ho montante dólar australianu millaun 20 (aproximadamente dólar amerikanu millaun 15,5 ne’ebé aloka ba Programa PNDS millaun $10,5 no BdMJF millaun $5).

Orsamentu ne’e uza hodi apoiu Programa Reziliénsia Komunitária no Rekuperasaun Ekonómiku durante pandemia Covid-19.

Nune’e, to’o ohin loron, Suku 396 mak benefisia ona husi apoiu ne’e ho totál projetu 411, ne’ebé kompostu husi projetu Bee Mo’os no Saneamentu hamutuk 230, Projetu Harii Estrada no Ponte 106 no Projetu Agrikultura 25.

Ministru Finansas, Rui Augusto Gomes hateten, apoiu orsamentu adisionál ne’e sei aloka diretamente ba komunidade sira atu harii infraestrutura bázika iha nível Suco no apoiu ba programa asisténsia sosiál ho alvu prinsipál mak inan isin-rua no bebé foin moris to’o tinan rua.

“Servisus no asisténsia sira ne’e, bele kria kampu traballu iha nível baze, oportunidade atu hetan rendimentu no hadi’ak liután prestasaun servisu família sira nian. Komponente rekuperasaun iha setór Saúde, Edukasaun no Protesaun Sosiál hirak ne’e, aliña ona ho Governu nia Planu Rekuperasaun Ekonómiku.”

Governante ne’e mós hatutan tan katak, apoiu orsamentu direita ne’e sei transfere diretamente ba iha Konta Tezouru Timor-Leste nian.

Ida-ne’e hatudu sinál konfiansa husi Governu Austrália ba sistema ne’ebé Estadu Timor-Leste estabelese ona no Oitavu Governu Konstitusionál apresia tebes ba apoiu sira husi Governu no Povu Australianu no komprometidu atu servisu hamutuk hodi hadi’ak liután.

Entretantu, iha Austrália nia tinan fiskál 2022-2023, orsamentu asisténsia dezenvolvimentu husi Austrália ba Timor-Leste hamutuk dólar australianu millaun 105,7 (aproximadamente dolar amerikanu millaun U$73).

Montante ne’e seidauk inklui apoiu orsamentu direta adisionál millaun $20 ba tinan 2023.