Tuir komunikadu ne’ebé Média Online INDEPENDENTE asesu husi Média-MTK katak serimónia asinatura kontratu ne’e halo iha Embaixada Timor-Leste iha Tokyo Japaun.

Asina akordu kontratu ne’e, Embaixadora Timor-Leste ba Japun, Maria Terezinha da Silva Viegas sai sasin ba serimónia refere.

Iha nia intervensaun, na agradese ba entidade hotu-hotu ne’ebé maka servisu makaas ohin bele realiza serimónia asinatura ne’e, no husu ba empreza Toa corporation atu halo obra ne’e tuir tempu no halo ho kualidade.

Iha tempu hanesan, Diretór TOA CORPORATION, Makoto hatete, projetu ba konstrusaun terminal aeroportu foun, hodi halo preparasaun ba iha simeira ASEAN tinan 2029 iha ne’ebé Timor-Leste maka sei sai uma nain, objetivu importante sira seluk - iha importánsia boot ba Timor-Leste. terminal ida ne’e sei sai odamatan ida ne’ebé aprezenta Timor-Leste ba mundu.

Purtantu, Tuir Diretor Senior Ezekutivu  Empreza Toa, Katsuhisa KIMURA projetu ida-ne'e iha signifikadu espesiál.

“Ami servisu ona iha Timor-Leste iha tinan pasadu, no ami kontente no orgullu bele hetan oportunidade atu servisu fali iha Timor-Leste. Liuhusi ami nia projetu sira iha pasadu, ami aprende buat barak kona-ba nasaun ida-ne'e no nia ema sira. Ami profundamente respeita espíritu maka’as no laran-di’ak povu timoroan nian iha respeitu aas liu"Dehan Diretor Senior Ezekutivu  empreza Toa, Katsuhisa KIMURA.

Katsuhisa KIMURA  afirma, sira iha kompromisu tomak atu hala'o projetu ida-ne'e ho kuidadu no responsabilidade ne'ebé maka'as liu. Seguridade, kualidade, no kompletasaun tuir tempu sei sai sira  nia prioridade prinsipál sira.

Iha tempu hanesan, sei respeita kultura lokál, ambiente, no komunidade sira ne'ebé hale'u. sira sei servisu besik ho Kliente, Konsultór, no parseiru sira atu halo projetu ida-ne'e sai susesu.

Nia afirma, projetu ne’e mós simboliza relasaun amizade no kooperativa ne’ebé metin entre Timor-Leste no Japaun, empreza Toa reafirma sira nia kompromisu tomak ba susesu projetu ida-ne’e nian. sei halo di'ak liu sei entrega terminal aeroportu ida ne'ebé maka povu Timor-Leste bele orgullu, la'ós de'it ba Simeira ASEAN nian iha 2029, maibé ba tinan barak tuir mai.

Iha fatin hanesan, Ministru Transportes no Komunikasaun, Miguel Marques Gonçalves Manetelu ho onra boot no ksolok simu empreza Toa corporation iha serimónia importante ne’ebé marka asina kontratu ba konstrusaun Terminál Pasajeiru Aeroportu Internasionál Prezidente Nicolau Lobato nian.

Nia afirma, projetu ida-ne'e kompleksu duni, edifísiu terminal pasajeiru nian maka komponente xave ida iha dezenvolvimentu no espansaun aeroportu.

“Kolaborasaun besik entre konsultór kontratór sira, enjeñeiru supervizór sira, autoridade aeroportu nian, no instituisaun governu relevante sira sei sai krítiku atu evita interupsaun téknika, prevene atrazu sira, no asegura katak komponente ida-idak aliña ho planu mestre jerál. Projetu ne’e reprezenta prioridade estratéjiku nasionál ida. Ida ne’e sei sai hanesan odamatan ba Timor-Leste, hasa’e konetividade, apoia turizmu, fasilita komérsiu, no hametin kresimentu ekonómiku, Halo projetu ida-ne'e tuir tempu, iha ámbitu, no tuir padraun kualidade aas liu maka responsabilidade fahe ida ne'ebé ita tenke simu hamutuk,” Afirma Ministru Manetelu.

Iha okaziaun importante ida-ne'e, Ministru Manetelu lori governu Timor-Leste nia naran hakarak hato'o apresiasaun sinseru ba governu no povu Japaun nian, no ba Ajénsia Korporasaun Internasionál Japaun nian, (JICA) ba sira nia apoiu no parseria ne'ebé kontinua. Sira nia kontribuisaun dala ida tan hatudu lasu amizade ne'ebé metin entre nasaun rua ne’e nian.

“Ami fiar iha ita-boot nia matenek, profisionalizmu, no esperiénsia atu entrega projetu infraestrutura importante ida-ne'e ho padraun aas liu. Maski serimónia ne’e ohin akontese iha Japaun maibé nia impaktu sei sente iha Timor-Leste tomak”  informa Manetelu.

Ministru salienta, “Mai ita hakat ba oin hamutuk ho determinasaun, disiplina, no kooperasaun hodi garante realizasaun susesu ba projetu nasionál vital ida ne’e. Ida-ne'e ezije padraun enjeñaria avansadu sira, ezijénsia seguransa nian ne'ebé rigorozu, integrasaun sistema aeroportu nian no aderénsia tomak ba regulamentu sira aviasaun internasionál nian. Aleinde ne'e, serbisu tenke koordena ho kuidadu ho komponente sira seluk ne'ebé la'o hela iha dezenvolvimentu aeroportu nian, inklui sira ne'ebé hetan apoiu hosi ADB no DFAT, hodi garante interfase sira ne'ebé laiha problema no operasaun ne'ebé la interompe hosi aeroportu. Tanba ne'e, koordenasaun ne'ebé efetivu sei sai esensiál”.

Ministru Manetelu reafirma, Kontratu ne’ebé ohin asina reprezenta la’ós de’it kompromisu legál ida, maibé vizaun ida ne’ebé fahe ba progresu, modernizasaun, no dezenvolvimentu ba tempu narukTimor-Leste nia.