Governu Aplika Hikas Serka Sanitaria Iha Ermera, Dili Mantein

By Saturnina da Costa Jullu 28, 2021 744
Reuniaun Konsellu Ministru ne'ebe prezidi husi Primeiru Ministru Taur Matan Ruak, kuarta (28/07). Foto:Gab.MPCM. Reuniaun Konsellu Ministru ne'ebe prezidi husi Primeiru Ministru Taur Matan Ruak, kuarta (28/07). Foto:Gab.MPCM.

DILI: Governu liu husi reuniaun Konsellu Ministru (KM) deside aplika hikas serka sanitaria iha Munisipiu Ermera hahú iha oras 00:00 loron 29 fulan-Jullu to’o oras 23:59 loron 12 fulan-Agostus tinan 2021.

Aleinde, iha Kapital Dili mós mantein serka sanitaria to’o oras 23:59 loron 12 fulan-Agostus.

Enkuantu, desizaun ne’e foti bazei ba aprezentasaun husi pontu situasaun epidemiolojika husi Sala Situasaun Sentru Integradu Jestaun Krize (SIJK).

“Konsellu Ministrus delibera mós projetu rezolusaun Governu nian rua, hodi mantein impozisaun serka sanitária iha munisípiu Dili to’o oras 23:59 husi loron 12 fulan-agostu tinan 2021 no impoin serka sanitária iha munisípiu Ermera entre oras 00:00 husi loron 29 fulan-jullu tinan 2021 to’o oras 23:59 loron 12 fulan-agostu tinan 2021,”dehan Ministru Prezidensia Konsellu Ministru Fidelis Leite Magalhães, iha Palasiu Governu, kuarta ne’e (28/07).

Nune’e, bandu sirkulasaun ema nian entre munisípiu Dili no Ermera no mós sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

“La inklui iha proibisaun sirkulasaun ida ne’e, indivíduu sira ne’ebé komprova vasinasaun kompleta (doze rua) kontra Covid-19 no mós ba labarik sira ho idade tinan 6 mai kraik ne’ebé akompaña,”tenik Fidelis.

Entretantu, Konsellu Ministrus aprova mós Dekretu Governu kona ba medida sira ezekusaun Deklarasaun Estadu Emerjénsia nian ne’ebé efetua husi Prezidente Repúblika n. 56/2021, loron 27 fulan-jullu, hodi hatán ba pandemia Covid-19.

Estadu emerjénsia, ne’ebé renova ona, abranje ba territóriu nasionál tomak no vigora entre tuku 00:00, loron 1 fulan-Agostu tinan 2021 to’o tuku 23:59 loron 30 fulan-Agostu tinan 2021.

Mantein medida sira ezekusaun deklarasaun estadu emerjénsia anteriór, liuliu obriga sidadaun sira hotu ne’ebé hela iha Timor-Leste atu mantein distánsia, pelumenus, metru ida ho ema seluk ne’ebé la hela iha ekonomia komún.

“Kontinua obriga sidadaun sira atu utiliza máskara oin nian ne’ebé taka inus no ibun bainhira hakarak tama ka hela iha fatin públiku ka privadu hirak ne’ebé ema hotu uza no fase liman bainhira hakarak tama ba estabelesimentu komersiál sira, industriál ka prestasaun servisu sira-nian ka ba edifísiu sira iha ne’ebé servisu administrasaun públika nian funsiona. Ema hotu-hotu nafatin iha obrigasaun mós atu evita formasaun halibur-malu, iha dalan públiku,”hakotu nia.

 

Asistente Editor: Saturnina da Costa

Rate this item
(1 Vote)
Last modified on Kuarta, 28 Jullu 2021 19:48

Independente Digital TV