Fretilin, PLP, KHUNTO Konsidera Angela cs Halo ‘Golpe’

By Ekipa INDEPENDENTE Setembru 02, 2020 1263
Fretilin iha PN. Foto dok. Fretilin iha PN. Foto dok.

DILI: Parlamentu Nasionál, bankada apoia governu, Fretilin, PLP no Khunto konsidera Angela Freitas ho ninia grupu konstitui ona asaun subversivu hasoru estadu RDTL.

Lia-fuan subversivu refere ba esforsu revolta hodi harahun estrutura poder inklui nasaun.

Xefe Bankada Fretilin, Francisco Miranda Branco deklara kestaun ne’e relasiona karta deklarasaun ne’ebé Angela Freitas ho nia grupu hasai iha 10 Agostu 2020 liu bá, ne’ebé ameasa Prezidente Repúblika, Francisco Guterres Lú Olo atu rezigna an.

“Iha deklarasaun ida ne’e, Señora Angela Freitas ho nia grupu obriga Prezidente da Repúblika atu rezigna an, sira sei mobiliza massa husi munísipiu hotu tuun ba Dili hodi hatun obriga husi ninia kargu nu’udar Prezidente Repúblika,” dehan Branco liu husi konferensia imprensa konjunta iha sala Bankada Fretilin.

Branco dehan, Angela mós deklara katak membru F-FDTL no PNTL ne’ebé hola parte iha grupu RNDJ-KRDTL sei utiliza arma ne’ebé iha hodi obriga PR Lú Olo tuun.

Deputadu ne’e hatutan, Angela mós ameasa katak bainhira hetan reasaun husi apoiante señor Francisco Guterres Lú Olo, sei utiliza grupu arte marsiál no arte rituál sira hodi destabiliza situasaun rai laran nune’e fó presaun ba PR Lú Olo.

Iha deklarasaun ne’e, nia dehan, portavoz RNDJ-KRDTL hatete mós katak bainhira laiha hotu dalan, tenke hamosu duni revolusaun ka funu nu’udar dalan ba halo mudansa ba sistema anti-demokrátiku iha Timor-Leste no elimina hotu apoiante anti demokrátiku liu husi forsa no polísia ne’ebé apoia ona movimentu ne’e.

Tuir Branco, deklarasaun ne’ebé asina husi Angela Freitas, António Aitahan Matak no Lucas Soares Colibere ne’e nia ton no linguajen nakonu ho lia-fuan no espiritu subversivu.

“Obriga Prezidente da Repúblika ida atu tuun husi kargu no ameasa sei uza grupu arte marsiál ho arte rituál sira ba destabiliza situasaun iha rai-laran. Deklara atu uza forsa no polísia ba elimina sidadaun seluk no hakarak atu hamosu funu iha Timor-Leste, deklarasaun hanesan ne’e labele halo husi ema patriota Timor-oan ne’ebé hadomi povu no rai ida-ne’e,” dehan Branco.

Tanba ne’e, Branco dehan, bankada Fretilin, PLP no KHUNTO konsidera deklarasaun ne’e konstitui ona áktu subversivu.

“Deklarasaun ida ne’e reklama mós katak sira hasai dokumentu ida ne’e lori estrutura partidu CNRT nia naran, Partidu Demokrátiku nia naran, estrutura ierárkia Igreja Katólika nia naran, Instituisaun Defeza no Seguransa no emprezáriu nasionál sira-nia naran,” nia hateten.

Maibé, Branco dehan, bankada Fretilin, PLP no KHUNTO apresia no louva Ierárkia Igreja Katólika iha Timor-Leste tanba Arsebispu Metropolitana Dili, Don Virgílio do Carmo da Silva hatete katak Igreja Katólika dezkoñese no la hola parte iha movimentu ida ne’e.

“Fretilin, PLP no KHUNTO hein katak partidu CNRT no Partidu Demokrátiku ne’ebé mak deklarasaun ida ne’e temi naran iha sira-nia dokumentu bele pronúnsia ba públiku sira-nia pozisaun relasiona ho dokumentu ida ne’e.”

“Bankada Fretilin, PLP no KHUNTO husu mós ba Xefe Estadu Maiór Jenerál F-FDTL, Majór Jenerál Lere Anan Timur no Komandante Jerál PNTL, Komisariu Polísia Faustinho da Costa atu esklarese ba públiku se loos duni ka la’e membru F-FDTL no PNTL ‘sorin balun’ ba hamutuk ona ho grupu señora Angela Freitas nian atu deztabiliza situasaun, elimina Timor-oan sira no atu halo funu hasoru estadu RDTL,” Branco husu.

Branco dehan, Fretilin, PLP no KHUNTO hanoin katak ida ne’e kestaun sériu, no estadu tomak tenke hola pozisaun no medida forte hasoru ema sira ne’ebé hakarak atu hakiak hahalok subversivu hasoru estadu ida ne’ebé liu ema 200 lakon sira-nia vida atu harii.

Ba kestaun envolvimentu CNRT iha asaun RNDJ-KRDTL, Vise Xefe Bankada CNRT, Patrocínio dos Reis Fernandes hatete, partidu CNRT laiha ligasaun ho atividade Angela Freitas nian.

“Angela Freitas ema sidadaun timoroan ne’ebé parese nia halo nia atividades, ne’ebé CNRT laiha konesimentu ba ne’e,” dehan nia.

Kona-ba fotografia prezidente CNRT Kay Rala Xanana Gusmão ne’ebé grupu RNDJ-KRDTL uza, Particinio dehan, Xanana la’os de’it hanesan prezidente partidu CNRT, maibé mós nu’udar patrimoniu estadu nian no maun boot ba ema hotu-hotu.

Tanba ne’e, nia dehan, laiha lei mak atu bandu timoroan ida uza Xanana nia fotografia ba ninia atividade ruma.

“Atu dehan dala ida tán katak partidu CNRT laiha koñesimentu kona-ba atividades sira ne’ebé mak Angela Freitas halo. Maibé iha konstitusaun ne’ebé fó liberdade ba ema hotu atu espresa sira ninia hanoin,” nia dehan.

Molok ne’e, Prezidente Partidu Demokrátiku (PD), Mariano Assanami Sabino deklara ona katak, PD la fó orientasaun ba militante sira atu halo manifestasaun hasoru estadu.

“Partidu Demokrátiku hakarak prosesu hotu tuir nia dalan, Partidu Demokrátiku laiha orientasaun no laiha koñesimentu,” dehan nina.

Tuir Assanami, PD respeitu sidadaun hotu ne’ebé hakarak hato’o petisaun no manifestasaun tanba konstituisaun RDTL fó garantia.

“Se sidadaun ruma mak halo manifestasaun ka halo petisaun ne’e direitu ida, maibé labele lori Partidu Demokrátiku nia naran,”nia afirma.

Rate this item
(0 votes)

Independente Digital TV