FONTIL Kria Mídia Advokasia Podcast Hapara Violensia Hasoru Feto ho Labarik

By Agustino Santos Gama Dezembru 07, 2021 339
Diretór Ezekutivu FONTIL, Daniel Santos do Carmo. Foto: Dok/INDEPENDENTE. Diretór Ezekutivu FONTIL, Daniel Santos do Carmo. Foto: Dok/INDEPENDENTE.

DILI: Forum Organizasaun Naun Governamental Timor-Leste (FONTIL) kria ona mídia advokasia Podcats hodi hapara violensia hasoru feto no labarik feto iha Timor-Leste. 

Diretór Ezekutivu FONTIL, Daniel Santos do Carmo, hateten, objetivu kria estudiu podcast atu reforsa advokasia liu-husi dezamina informasaun ba públiku no ema ne’ebé foti desizaun hodi kombate problema sosiál, liu-liu problema violénsia hasoru feto no labarik feto iha rai laran.

“Ita fó oportunidade ba públiku hanesan, NGO, Institusaun Governu, Organizasaun Juventude no organizasaun relevante sira, hodi hato’o aspirasaun no persepsaun liu-husi diskusaun hodi diskute kona-ba asuntu prioridade inklui problema sosiál,” dehan nia iha edifisiu FONGTIL, segunda horseik (06/12).

Nia hatutan, kria estudiu advokasia nudar atividade ne’ebé inspiradu husi kursu advokasia ba transformasaun jeneru, tanba daudaun ne’e ema moris iha era dijitalizasaun no maioria ema hotu-hotu asesu ona ba kanal internet hanesan youtube, facebook no sira seluk.

Ida-ne’e atu haforsa advokasia hodi muda opiniaun públiku no mós desizaun públiku sira liuhusi kria podcast ne’e, hanesan meiu diálogu ka diskusaun ne’ebé rekorda liuhusi video hodi fahe ba iha kanal internet sira hodi públiku bele asesu.

Daniel Esplika, benefisiu husi kria estudiu podcast mak fó espasu ba membru ONG no Sosiedade Sivil sira hodi aprezenta deskobrementu, talentu, aspirasaun nomós bele promove produtu ONG sira nian ba públiku no reforsa advokasia ba muda desizaun públiku sira.

Enkuantu, métodu ba utilizasaun podcast mak halo diskusaun ho modelu talk show hanesan iha rádiu, maibé liuhusi gravasaun ka transmisaun direta liuhosi kanal internet no rai hanesan dokumentasaun.

Iha fatin hanesan, Jestora Subvensaun Públika, Unidade Auditóriu Social, Gabinete Primeiru Ministru, Nori Maria Soares, hateten atividade ne’e importante tebes, tanba Unidade Auditóriu Sosial parseria ho FONGTIL, ne’ebé uluk asina nota entendimentu ida hahú ona iha tinan 2015.

Nia akresenta, nune'e hodi fó fundu ba membru ONG sira-ne’ebé halo atividade iha setór importante haat hanesan edukasaun, saúde, agrikultura, infraestrutura bázika no asesibilidade ba ema ho defisiénsia.

“Meiu ida-ne’e importante atu sira bele haree direta podcast, atu nune’e bele hafanu sira atu sira hanoin bebeik deskobrimentu sira-ne’ebé membru FONGTIL sira foti,” Katak nia.

Entrentantu Diretór Asia Justice and Rights (AJAR), José Luís de Oliveira, apresia ba inisiativa ne’ebé FONGTIL foti hodi dezenvolve podcast iha FONGTIL.

Husi ne’e bele ajuda mós parseiru sira atu divulga informasaun sira, aleinde ne’e bele halo advokasia hapara violensia ba feto no labarik feto sira iha Timor-Leste.

“Ha’u deseza katak, FONGTL seriu duni dezenvolve podcast, inklui prepara funsionáriu sira bele jere podcast ne’e atu buat ne’ebé ita mehi bele sai realidade,” Nia dehan.

Enkuantu, espesialista programa inisiativa spotlight, Kathryn Robertson hateten, spotlight hanesan inisiativa ida ho fundu hosi Uniãun Europeia ne’e hola parte iha inisiativa bo'ot iha mundu, kona-bá hapara violénsia hasoru feto no labarik feto.

“Ida ne’e importante, tanba ita atu hapara violénsia kontra feto ho labarik feto", nia dehan.

Tuir nia, atu hapara violensia hasoru feto no labarik feto persija servisu iha nível hotu-hotu iha sosiedade sivil ho Governu, komunidade, igreza, eskola no emprezáriu.

Rate this item
(0 votes)

Independente Digital TV