Feto Potensial Na’in 18 Eleitu ba Xefe Suku ba Periodu Tinan Hitu Featured

By Ekipa INDEPENDENTE Novembru 15, 2023 3951
Xefe Suku Babulu asume dala ida tan pozisaun nuudar xefe suku ba periode tinan 2023-2030. Foto: Media SEI. Xefe Suku Babulu asume dala ida tan pozisaun nuudar xefe suku ba periode tinan 2023-2030. Foto: Media SEI.

DILI: Tuir dadus ne’ebé Sekretária Estadu Igualdade asesu husi Comisaun Nasional Eleisoens, katak husi totál suku 452 iha terrítoriu Timor laran, iha suku 442 mak tinan ida-ne’e hili nia Xefe-Suku foun.

Enkuantu, Suku 10 seluk laiha eleisaun ba xefe-suku tanba konsidera hanesan Suku foun. Husi totál suku 442, kandidatu ba lideransa suku hamutuk ema na’in 2,105 kompostu husi feto na'in 241 (11%) no mane hamutuk 1,864 (89%) mak kompete iha eleisaun suku refere.

Iha Eleisaun Suku ne’e, husi totál Suku 442 iha suku 263 mak avansa ba segunda ronda, nune’e, suku 179 mak la avansa ba segunda ronde tanba iha primeiru ronde hetan ona xefe-suku eleitu sira.

“Husi totál suku 442, provizoriamente iha ona rezultadu ne’ebé hatudu katak lideransa feto hamutuk na’in 18 mak eleitu ba Xefe-Suku (4%) mak hanesan, Munisípiu Aileu iha Xefe-Suku feto eleitu hamutuk na’in 4, Ainaro na’in 1, Baucau na’in 4, Bobonaro na’in 1, Covalima na’in 1, Díli na’in 3, Ermera na’in 1, Manatuto na’in 2 no Manufahi na’in 1,”Online INDEPENDENTE sita iha komunikadu.

Entretantu, iha biban ne’e Sekretária Estadu ba Igualdade, Elvina Sousa Carvalho hato’o parabens ba iha Ministériu Administrasaun Estatal, liuhusi STAE no CNE ne’ebé realiza ona Eleisaun Xefe-Suku iha terrítoriu Timor laran tomak ho di’ak no susesu tebes.

“Hakarak hato’o mós agradesimentu ba iha instituisaun seguransa no defeza ne’ebé asegura no fó seguransa di’ak ba eleisaun suku no ba joven mane, joven feto, ferik-katuas no inan feton sira, portadóra defisiénsia no komunidade hotu hodi partisipa iha eleisaun suku ne’ebé la’o ho susesu,”tenika SEI.

SEI haktuir, kompara ho Xefe-Suku Feto períodu liubá, períodu ida-ne’e númeru xefe-suku feto ne’ebé eleitu tun ho persentajen 1% (iha períodu 2016-2023 Xefe-Suku Feto na’in 21 ka 5%).

Nia akresenta, Sekretaria Estadu ba Igualdade (SEI) hanesan Instituisaun Estadu ne’ebé Koordena no halo advokasia ba iha parte hotu nafatin enkoraja no promove partisipasaun lideransa feto sira iha nivel foti-desizaun tantu nasionál no lokál.

 Esperiénsia ne’ebé lideransa Feto sira hetan iha Eleisaun Xefe-Suku períodu ida-ne’e nafatin sai lisaun no preferénsia ba Lideransa Feto ho Potensialidade sira atu haka’as an nafatin, labele dezanima no iha prontidaun nafatin atu kompete no okupa iha kualkér pozisaun foti-desizaun nian.

“Parabéns ba Xefe-Suku Eleitu sira liuliu ba Xefe-Suku Feto. Povu hein ita-boot sira-nia servisu maka’as hodi dezenvolve ida-idak nia suku tuir kompromisu ne’ebé hato’o ona liuhusi programa sira”.

Rate this item
(2 votes)
Last modified on Sexta, 17 Novembru 2023 11:34

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30