Nia dehan, husu atu foinsa’e sira haburas de’it maka espíritu toleránsia hodi garante pás no estabilidade tanba juventude mak símbolu unidade nasionál.

"Joven sira muda mentalidade ne’ebé la di’ak, labele uza atribuitu Arte Marsiais nian hodi la’o tun sa’e, hodi kria problema ba maluk sira seluk, tanba ne’e la kontribui ba kresimentu sosiedade nian,”  dehan Tenente Jenerál Falur Rate Laek ba jornalista sira hsfoin remata enkontru ho Xefe Estadu iha Palasiu Prezidensiál Bairu-Pite, Sexta (11/11).

Nia fó hanoin katak, jventude ida uluk hanaran klamar no isin maubere, uluk luta ho espíritu nakonu ho sakrifísiu, solidariedade no hadomi malu.

Tamba ne’e, juventude ohin loron tenke kontinua lori espíritu ne’ebé juventude rezisténsia rai hela, hodi kontribui no apoiu malu bá moris di’ak, la’ós estraga malu. Juventude hanesan ema sarani, tenke hadomi-malu hanesan Timoroan, kria amizade, konstrui pás no hametin fraternidade ba sosiedade ida tolerante.

Molok ne'e, akontese konfrontu entre joven sira iha área Fatunaba, Suku Dare, Postu-Administrativu Vera Kruz, Munisípiu Dili, ne’ebé rezulta ema ida lakon vida ne’e deskonfia iha involvimetu grupu arte marsiais.