Ema Na’in 3 Ne’ebé Mate, Seidauk Simu Vasina

By Agostu 31, 2021 377
Ema mate. Foto:Dok/Independente. Ema mate. Foto:Dok/Independente.

DILI: Sidadaun Timor-Oan na’in tolu ne’ebé ohin (31/08) mate ho Covid-19, seidauk simu vasina.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, matebian na’in tolu ho identidade mane rua no feto na’in ida, ho idade tinan minimu 43 no masimu 63.

“Matebian mane dahuluk ho idade 43 hela iha Dili, seidauk vasina, nune’e iha loron 31 fulan-Agosto tinan 2021 madrugada, diagnóstikadu iha Óspital Nasional Guido Valadares (HNGV) ho sindroma insufiénsia respiratoria aguda (SIRA) tanba Covid-19. Matebian hakotu-iis ohin (31/08) madrugada, iha tuku 01:44 oras Timor-Leste, tanba respiratoric failure/parajen respiratoria,”dehan nia iha komunikadu ne’ebé Online INDEPENDENTE asesu, tersa ne’e.

Aleinde, matebian mane daruak ho idade 55 hela iha Munisipiu Ainaro no seidauk vasina, nune’e iha loron 30 fulan-Agosto tinan 2021 hetan diagnóstikadu iha Óspital Ainaro ho sindroma insufiénsia respiratoria aguda (SIRA) tanba Covid-19. Enkuantu, matebian iha mós istoria moras ipertensaun.

Tanba ne’e, familia rejeita atu evakua pasiente mai iha Dili.

Nune’e, matebian hakotu-iis iha uma ohin dader, iha tuku 05:00 oras TL.

Entretantu, iha mós feto ida ho idade 63 hela iha Munisipiu Vikeke, matebian refere seidauk hetan vasina. diagnóstikadu iha Munisipiu Vikeke ho sindroma insufiénsia respiratoria aguda (SIRA) tanba Covid-19.

Enkuantu, matebian iha mós istoria sofre tuberkoluze pulmonar, nune’e iha segunda horseik (30/08), tuku 18:55 oras TL, matebian hakotu-iis iha fatin Izolamentu, tanba respiratoric failure/parajen respiratoria.

Ho nune’e, familia husi matebian na’in tolu ne’e kordena ona ho ekipa saúde atu hala’o funeral tuir protokolu ne’ebé adopta iha Timor-Leste.

Tuir dadus, total ema ne’ebé mate ho Covid-19 iha Timor-Leste hamutuk na’in 67.     

 

Asistente Editor: Saturnina da Costa

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV