Mudansa projetu konstrusaun ne’e tanba fatin iha Komunidade Irmãs Canossiana Balide nian labele akumula dormitóriu ne’e.
Asuntu ne’e Vise-Primeiru-Ministru Asuntus Ekonómikus, Francisco Kalbuadi Lay, hamutuk ho Embaixadór Emiradus Árabes Unidus bá Repúblika Indonézia, aprezenta ona bá Primeiru-Ministru (PM), Kay Rala Xanana Gusmão liu-hosi enkontru iha Palásiu Governu, kinta (24/07/2025).
Embaixadór Naun Rezidente bá Repúblika Demokrátika Timor-Leste no bá ASEAN, Abdulla Salem AlDhaheri, hato'o agradese bá Primeiru-Ministru, Kay Rala Xanana Gusmão ne’ebé fó tempu hodi simu ekipa ne’e iha Palásiu Governu maski okupadu ho ajenda servisu Governu nian.
“Ami Diskute asuntu lubuk ida, maibé espesifikamente ami ko’alia-liu kona-bá oinsá atu dezenvolve hamutuk projetu konstrusaun dormitóriu bá estudante femeninu ne’ebé antes ne’e tuir loloos atu konstrui iha Komunidade Madre Canossiana Balide. Ami simu solititasaun atu muda fatin konstrusaun ne’e tanba iha Komunidade Canossiana Balide fatin mak klo’ot labele akumula domirtóriu ne’e. Tanba ne’e ami halo hela re-dezeñu,” dehan Abdulla Salem AlDhaheri atualiza iha Palásiu Governu, Kinta (24/07).
Embaixadór hatuta, ne’e sei akumula estudante feto sira ne’ebé laiha kapasidade atu aluga uma iha Dili hodi hala’o estudu no bainhira hela iha dormitóriu ne’e sei selu duni maibé ho folin ne’ebé kiik.
Tan ne'e, EAU ho Governu Timor-Leste sei asina Nota Entendimentu iha fulan oin bá konstrusaun no konsultór bá projetu ne’e mós ohin marka prezensa iha-ne’e hamutuk ho ekipa, ne’ebé sei lidera projetu ne’e.
Enkuantu iha enkontru semenal entre Primeiru-Ministru, Kay Rala Xanana Gusmão ho Prezidente Repúblika (PR), José Ramos-Horta, ko’alia mós kona-bá asuntu ne’e katak, iha Palásiu Prezidente nia kotuk EAU sei konstrui dormitóriu bo’ot ida bá estudante feto sira.
“Loloos ne’e atu halo iha Balide, maibé tanba fatin klo’ot entaun sira muda fali mai halo iha Palásiu Prezidente nia kotuk. Agora daudaun SEATOU halo hela servisu atu hamamuk fatin ida ne’e. Dalaruma mós bele halo sira-nia Embaixada iha-ne’e,” PM Xanana hateten.
Durante enkontru, sira diskute mós kona-bá izensaun vistu entre nasaun rua nian. Emiradus Árabes Unidus orgullu tanba bele servisu hamutuk ho Timor-Leste no iha interese tebes atu mai halo investimentu, nune’e bele loke kampu traballu bá Timoroan sira inklui hametin liu-tán kooperasaun entre nasaun rua nian.
