Tanba tuir nia katak, jornalista rasik mak sai sasin ba situasaun no kondisaun iha terrenu (fatin Izolamentu), sira iha direitu atu hakerek.
Dr. Rui deklara kestaun ne’e, relasiona reasaun mediku balun ba publikasaun Online INDEPENDENTE nian liuhusi portal www.independente.tl kona-ba mediku nia intervensaun tarde ba bebé ne’ebé hetan moras iha Izolamentu Tasi-Tolu.
Bazeia ba jornalista Online Independente nia sasin iha Izolamentu Tasi-Tolu, loron sesta (04/06), hatudu katak bebé na’in ida moras ho isin manas makás, halo nia tanis husi dader to’o lorokraik no halo nia liman-ain to’os hotu, maibé laiha atendimentu seriu husi mediku sira.
Enkuantu mediku balun tenta atu subar lialos kona-ba situasaun iha Izolamentu Tasi-Tolu ne’e no kestiona katak informasaun ne’e la los.
Tanba ne’e, bainhira Online INDEPENDENTE halo konfirmasaun ba Dr. Rui nudar Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, nia responde katak obrigasaun hanesan jornalista hakerek buat ne’ebé realidade.
“Se ami sira ne’e ruma mak hatete lalos ne’e tenki hatudu faktus, ha’u pesoalmente seidauk haree notisia ne’ebé ita bo’ot públika, se iha ema ruma mak hateten laloos karik depois ema ne’e mak tenki hatudu nia faktus,” dehan Dr. Rui ba online Independente via-telefone Sabadu (05/06).
Nia esklarese, buat ne’ebé mak Jornalista sira hare bele hakerek ne’e laiha problema, tanba situasaun ne’ebé hare ho matan rasik mak hakerek, ne’ebé jornalista iha direitu atu hakerek notisia.
Entretantu, bebe ne’e agora halo hela tratamentu intensivu iha Izolamentu Vera Cruz.
Asistente Editor: Saturnina da Costa
