Diretora Nasional Veterínaria-MAPPF, Joanita Jong hatete, Diresaun Veterínaria liu husi ekipa Vasinador hala'o programa vasinasaun hahú iha tinan kotuk.

Nia dehan, aliende halo vasinasaun, ekipa vasinador halo mós sosializasaun ba komunidade sira kona ba vasinasaun moras raiva nian, atu nune’e komunidade sira bele koopera hodi bele vasina ba animal sira, liliu animal asu.

“Ami nia ekipa vasinador halo vasinasaun hahú husi dia 13 fulan-Fevereiru, hahú iha munisipiu Aileu, Ainaro Bobonaro, Kovalima, Dili, Likísa, Ermera no Oecusse, ho total ita vasina ona asu 8.756, busa 225 no ita mós vasina lekirauk 32 ne’ebé total hamutuk 9.013. Ne’e mak animal ne’ebé ita vasina iha munisípiu hirak ne’ebé ohin temi ne’e,”dehan nia ba Jornalista Online INDEPENDENTE, iha nia knar fatin, MAPPF, Komoro, Segunda (11/08/25).

Nia hatutan, moras raiva ne'e, fatalidade 100%,  maibé nia mós prevene 100%, signifika animal hotu-hotu tenke hetan vasinasaun, liuliu animal asu, tanba lais liu transmite moras rabies ba animal sira seluk no ba ema.

Tanba ne'e, Diretora Nasional Veterínaria rekomenda nafatin ba komunidade sira atu koopera ho ekipa vasinador, nune'e prevene moras raiva labele daet ba ema seluk.

“Tanba ne’e mak komunidade sira hotu nafatin tenki kopera bainhira ekipa vasinador ne’ebé tun ba halo vasinasaun iha ita bo’ot sira nia área, sé la kopera, asu ne’e la vasina hetan tata husi asu ne’ebé mak moras rabies, bainhira nia tata ita ema ho animal seluk, entaun nia bele transmite moras ne’e, tanba bainhira kona ba ita em,a hatudu ona asu tata ita la halo medidas preventiva ba ita nia-an imediatamente ita hadutu ona sinais ita nia mortalidade ne’e 100% sei la salva,”tenik Diretora Joanita Jong.

Entretantu, Diretóra ne’e akresenta, tuir dadus ne’ebé Diresaun Veterínaria rezista, totak kazu mortalidade ne’ebé kauza husi virus raiva ka asu tata hamutuk na’in 10, ne’ebé mai husi Munisipiu Bobonaro, Kovalima, Ermera no RAEOA.