Deputadu Aurelio husu Invetiga Projetu Normalizasaun Mota Ira-bere

By Jacinto Xavier Janeiru 21, 2017 3055

DILI: Deputadu Aurelio Freitas husu atu loke investigasaun ba projetu normalizasaun mota Ira-bere, Munisipiu Vikeke, tanba deskonfia mosu erru balun.

Deputadu ne’e husu mós ba Ajensia Dezenvolvimentu Nasionál (ADN) atu labele halo lai pagamentu molok problema ne’e resolve.

Deputadu Aurelio dehan, presiza hala’o investigasaun ba projetu ne’e, tanba durante fiskalizasaun iha terenu, Komisaun Eventual la haree fizikamente obra ne’e.

Nia hatutan, iha inisiu orsamentu ne’ebé atu aloka ba projetu ne’e ho montante  rihun $17 maibé, derrepente orsamentu ne’e sa’e fali ba rihun $800.

“Ha’u hanoin Ajensia Dezenvolvimentu Nasionál (ADN) tenke halo fali verifikasaun ba dokumentus hotu, tanba presu inisiu $17 mill ne’e sa’e dramatizamente ba $800 mill, ne’e presiza haree didi’ak,” dehan Aurelio iha PN, Sesta (06/01).

Iha fatin hanesan, Diretór Jeral ADN, Samuel Marçal hatete, obra ne’ebé mak implementa ona maibé laiha koñesimentu husi ADN sei la selu.

Ba projetu normalizasaun mota Ira-bere, nia dehan, tekniku ADN sei verifika hafoin haree prosesu ba oin ne’e oinsa.

Nia hatutan, durante ne’e molok halo pagamentu ba projetus ne’ebé implementa, ADN sempre halo verifikasaun.

“Ami la’os halo pagamentu ba obra ida bazeia ba dokumentus ne’ebé aprezenta husi kompaña, no tekniku sira mós halo analiza ba presu ne’ebé iha, tanba ami tauk depois ami halo pagamentu hotu, ami tenke hetan investigasaun (husi) Tribunál de Contas, Ministériu Públiku, no KAK rasik,” dehan Samuel.

Rate this item
(0 votes)

Independente Digital TV