Atividade formasaun ne’e realiza husi Asosiasaun Ema Halibur Defisiensia Matan Timor-Leste (AHDMTL), liuhusi programa Dezenvolvementu Nasoens Unidas (UNDP), no hetan apoiu fundus husi Governu Japaun.

Tuir Diretór Ezekutivu AHDMTL Gaspar Afonso hatete, formasaun Letra Braille ne’e implementa husi projetu UNDP atu nunee fasilita sira iha eleisaun ne’ebé mak rezilienti ba informativu no inkluzivu, iha nivel nasional no munisipal.

“Agora dadaun ita nia maluk defisiensia matan sira hamutuk 120 mak kompleta ona formasaun letra Braille, atu nunee sira bele assesu mós iha eleisaun tuir mai, husi númeru defisiensia matan hirak ne’e mai husi munisipiu Aileu, Lautem, no Manufahi,”dehan nia iha Hotel Timor, Tersa (07/12).

Nia informa, bazeaia ba programa ne’e hanesan prinsipiu universal ba Ajenda Dezenvolvementu Sustentavel 2030, ho nia intensaun atu reduz dezigualidade no vulneral ne’ebé hatuun ema ida-idak nia potensial.

Iha fatin hanesan, reprezentante Embaxadór Japaun ba Timor-Leste Munkhtuya Altangerel afirma tan katak, eleisaun livre no justu katak votante elijivel ne’ebé inkluzivu ne’e hanesan xavi ba demokrasia.

“Ami orgullu tebes tanbá formasaun letra braille ne’e hala’o ho susesu husi projetu UNDP CORE-TL Resilient Elections iha Timor-Leste ne’ebé apoiu husi Governu Japaun no implementa husi UNDP, ho Ida ne’e bele kontribui ba eleisaun sira iha Timor-Leste, liuliu ba maluk defisiensia sira oinsa bele assesu ba iha eleisaun inklui atividade sira seluk,”dehan nia.

Nia dehan, iha tinan 2022, projetu UNDP CORE-TL Project sei kontinua implementa formasaun ida ne’e iha munisipiu sira seluk no RAEOA no atividade seluk ne’ebé reforsa kapasidade ema ho difisiensia nunee bele promove sira nia partisipasaun iha politika no reprezentasaun iha politika.