Portavoz SIJK, dr. Rui Maria de Araújo informa katak, númeru positivu nafatin hanesan dadus kinta-feira horsehik nian. Sira ne’ebé konfirmadu positivu no provavél hamutuk iha fatin izolamentu Sentru Saúde Vera Crus, maibé hela iha fatin ketak-ketak.
Nia esplika, husi númeru konfirmadu ho provavél ne’e, fahe ba ba grupu haat. Grupu primeiru; halo viajen husi fronteira-Batugade mai Dili iha loron 1 fulan-Abril ho bis Maliana, no sira kuerentina iha Otél Katuas ne’ebé konfirmadu positivu hamutuk na’in 16, no provavel na’in rua (2).
Grupu segundu; halo viajen husi fronteira mai Dili ho bis Maliana iha loron 29 fulan-marsu, no kuerentina iha Otél Fortuna, ne’ebé provavél na’in ida. Grupu terseiru; halo viajen husi fronteira mai Dili ho bis MTCI nian iha loron 2 fulan-Abril, no kuerentina iha Otél Timine, ne’ebé konfirmadu na’in ida. Grupu kuartu; ne’e mós halo viajen husi fronteira mai Dili ho bis Maliana iha loron 8 fulan-Abril ba kuerentina iha Otél Novo Orizonte, ne’ebé provavél na’in ida.
“Totál hamutuk na’in 21, protantu konfirmadu 17, provavel na’in haat (4), ne’ebé atualmente hela iha fatin izolamentu Sentru Saúde Vera Crus Dili,”dehan dr. Rui, sesta ohin, iha sala situasaun SIJK, CCD Dili.
Entretantu tuir númeru afeitadu COVID-19 mundiál, sesta ohin (17/4) ne’ebé rekoilla husi online Worldometer hatudu katak kazu abitante afeitadu hamutuk millaun 2.179.905, mate rihun 145.410, no rekooperadu rihun 546.743.
Estadu Unidos Amerika (EUA) nasaun ida dahuluk afeitadu ema mate barak husi COVID-19, afeitadu infesaun rihun 677.056, mate rihu, no rekooperadu rihun 57.271.
