Dadus 10 Maiu: Pasiente Covid-19 Rekuperadu Sa’e Ba 22 Featured

By Elsa Belinha Maiu 10, 2020 2256
Dra. Odete Viegas Dra. Odete Viegas

DILI: Atualizasaun dadus Covid-19 iha loron 10 fulan-Maiu pasiente konfirmadu pozitivu Corona Virus Deasses (Covid-19) ne’ebé baixa iha fatin izolamentu Vera Kruz aumenta na’in ida rekuperadu.

Tanba ne’e total rekuperadu Covid-19 sa’e ba 22 ona kompostu husi konfirmadu pozitivu na’in 18 no provavel na’in haat (4).

Porta Voz Sentru Integradu Jestaun Krize (SIJK) Doutora Odete Viegas da Silva hatete, dadus kumulativa ba ema ne’ebé halo teste laboratóriu hahú husi loron 6 fulan-Marsu to’o agora hamutuk 909.

“Ema ne’ebé hein rezultadu laboratóriu hamutuk 104, pasiente na’in neen (6) sei baixa iha Vera Cruz hein teste tuir mai,”dehan nia liuhusi konferensia imprensa iha CCD, ohin.

Nia informa, ema ne’ebé hatudu rezultadu laboratóriu negativu hamutuk 781, ema sei iha kuerentena hamutuk 117 kompostu husi Dili 89 no iha munisipiu 28 no ema ne’ebé halo auto kuerentena hamutuk 34 kompostu husi Dili na’in 3 no husi Munisipiu na’in 31.Ema ne’ebé maka passa ona loron 14 iha konfinamentu hamutuk 2.108 kompostu husi Dili 1.663 no iha munisipiu 445.

Nia husu ba autoridade munisipiu no autoridade lokal sira katak ekipa Ministériu Saúde hamutuk ho SIJK halo triajen iha fasilidade saúde sira iha munisipiu hotu ho objetivu ida katak atu foti amostra hodi hatene transmisaun Covid-19 iha komunidade nia leet. Tanba ne’e husu autoridade lokal sira hotu atu koopera ho ekipa sira, faze dahuluk hahú husi loron 5-8 fulan-Maiu ne’e no faze daruak sei hahú iha loron 11-15 fulan-Maiu.

Husu ba komunidade atu kumpri nafatin protokolu husi Organizsaun Mundial Saúde (OMS) nian kuidadu nafatin ijiene pessoal fase liman bebeik mantein distansiamentu sosial nomós distansiamentu fíziku. Hakmatek iha uma kuandu la iha nesesidade ne’ebé importante iha li’ur. Sai ba li’ur tenke uza maskara.

Nia mós informa katak wainhira iha sintomas infesaun respiratória aguda (IRA)  hanesan isin manas, kakorok moras, me’ar, inus-been, ruin kiik- bo’ot siin halo favor ba konsulta iha sentru saúde ka ospital sira. Se lakohi atu hetan moras Covid-19 ne’ebé grave ka krítiku hapara fuma sigaru no hemu tua.

Rate this item
(0 votes)

Independente Digital TV