Kordenador Forsa Tarefas no Mitigasaun Surtu Covid-19 iha Timor-Leste, Rui Maria de Araujo hatete, kazu foun hirak ne’e iha mane na’in 39 no feto na’in 23.

“Ema ne’ebé sintomas iha na’in 3 no asintomatiku ka la hatudu sintomas hamutuk na’in 59 (63,3 %),”dehan nia iha konferensia imprensa (19/04).

Husi total kazu detetadu foun ohin iha 43 ka hanesan ho 69,3 % husi total kazu mak deteta tanba sira halo teste, ho razaun atu viajem ka halo ona viajem ba munispiu hafoin deteta kazu positivu.

Totál kazu konfirmadu kumulativu (sura husi 21 marsu 2020) hamutuk 1368.

Entretantu kazu foun ohin loron hamutuk na’in 62, kazu rekuperadu iha na’in 30 no kazu ativu ne’ebé iha izolamentu hamutuk na’in 673.

Husi loron horseik (18/04) mai ohin loron 19 Laboratorium Nasional Saúde halo teste PCR hamutuk 535. husi detallas hanesan tuir mai, vijilansia sentinela iha na’in 6, restreiu ba kontaktu iha ema na’in 102, rastreiu aliatoriu iha na’in 179 no viajem atu sai husi serka sanitaria Dili hamutuk 245.

Ema ne’ebé husu teste PCR atu viajem ba internasional hamutuk na’in 3.

SIJK mós relata kazu detetadu na’in 8 iha izolamentu Vera Cruz iha área obstetrisia na'in 3, medisina interna  na'in 5.

Sira na'in 3 iha obstetrisia, na’in 1 partu normál (bebé 1), na’in 1 seluk partu oan-kaduak, no mós 1 fali ho istória cesariana, hein atu partu. Sira na'in 3 kategoria moderadu hotu no kondidaun bebé na’in 3 estável.

Sira na'in 5 ne’ebé iha medisina interna, 1 grave, na'in 4 moderadu.

Kazu grave ne’ebé iha Vera Cruz, nafatin uza ventiladór no aimoruk balu tuir protokolu ne’ebé Timor-Leste adopta.

Kazu mundial Covid-19 ba loron ohin (19/04), hatudu ema na’in 140.886.773 mak afetadu Covid-19 no na’in 3.012.251 mak mate.

Jornalista:Saturnina da Costa

Editor:Jose Sarito Amaral