Sasan ne’ebé Aviaun Royal Force Airo Nova Zelandia tula mai hodi apoia ba vitima inundasaun mak, hanesan sasan hijiene familia nian, sasan ba inan no labarik kiik, aimoruk ba bebe, bomba bee no lampada solares.
Entertantu ekipamentu ba protesaun pesoal, mak hanesan protetores oin nian, luvas maskra, oklu protesaun, material ba Swab no ropa mediku nian.
Apoiu ne’e atu distribui ba vitima inundasaun ne’ebé akontese iha loron 4 fulan-Abril 2021.
Vitima ne’ebé afeitadu husi inundasaun total familia hamutuk rihun 25, hela fatin estragus 4,546, no mate na’in 45.
Sasan hirak ne’e sei distribui husi UNICEF servisu hamutuk ho Guvernu Timor-Leste.
Ministra Negosio Estranjeiru Nova Zelandia Nanaia Mahuta hatete katak, Governu Nova Zelandia prontu ajuda Timor-Leste bainhira Governu Timor-Leste presija.
"Ami nia hanoin hamutuk ho povu Timor-Leste ne’ebé hetan impaktu husi bee sae makaas no rai halai iha momentu ne’ebé nasaun ne’e mos sei enfrenta kazu Covid-19 foin lalais,"dehan Mahuta liuhosi komunikadu ne’ebé online Independente asesu iha aeroportu Internasional Nicolau Lobato Dili.
Aliende ne’e, Ministra ne’e informa katak hafoin inundasaun mosu iha Dili, Governu Nova Zelandia liuhusi ajensia World Food Programme (WFP) iha Timor-Leste mós suporta transporte no distribui sasan sokorru ba vitima inundasaun sira iha Dili no Munisipiu sira ne’ebé hetan impaktu.
Nova Zelandia mós sei servisu hamutuk ho sosiedade sivil sira hodi responde ba problema inundasaun inklui responde imediata ba umanitaria no atividade sira ba rekuperasaun iha tempu mediu.
Tuir planu Governu Nova Zelandia mós sei oferese osan ho montante milaun dolar amerika $1.4 ba Timor-Leste hodi rekupera situasaun Covid-19 no dezastre natural.
Jornalista:Camilio de Sousa
Editor:Jose Sarito Amaral
