Domingu, 19 Setembru 2021 | Login
Kazu positivu Covid-19. Kazu positivu Covid-19.

Covid-19: Kazu Foun 34, Daet Tan ba Ataúro 2 Featured

DILI:Sala Situasaun Sentru Intregradu Jestaun Krize (SIJK) relata ohin loron 2 fulan-abril tinan 2021, rezista tan kazu foun na'in 34, inklui kazu na’in 2 husi Ataúro, nunee kazu ativu sa'e ba 461.

Tuir Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo hatete, kazu foun na’in 34 ne’e kompostu husi mane na’in 19 no feto na’in 15.

“Husi kazu konfirmadu hirak ne’e iha sintomatiku na’in 2 no asintomatiku ka lahatudu simtomas hamutuk nain 32,"dehan nia liu husi zoom iha CCD, (02/04)

Nia esplika, evulusaun surtu Covid-19 iha munisipiu Dili iha kazu foun 34. Nune’e, kazu detetadu ka pozitivu iha Munisipiu Dili husi loron 7 fulan-Marsu 2021, to’o ohin, loron 2 fulan-Abril 2021, hamutuk hotu 527.

Enkuantu kazu foun na’in 2 husi Postu Administrativu Ataúro, Munisipiu Dili, pasiente na’in rua ne’e halo viazen husi Dili iha loron 31 fulan-Marsu. Iha Dili sira hela iha Bidau Santana, tanba ne’e ekipa konjunta saúde buka tuir hela sira nia kontaktu besik iha Dili nomos Ataúro.

Nunee iha munisipiu Dili iha cluster foun 2 kompostu husi Cluster Ataúro ho CLuster Aldeia Rai Na’in, suku Bairu Pite.

Ho nune’e, iha Munisipiu Dili, sei iha cluster 50 maka sei nafatin hatudu atividade hada’et tutan virus SARS-CoV-2, husi ema ida ba ema seluk, liu-liu iha Suku Madohi, Bebobuk, Fatuhada, Comoro, Bairro Pité, Motael, Kulu-Hun, Lahane Oriental, Becora.

Enkuantu dadus jeral ohin loron 2 fulan-abril tinan 2021 Kazu foun 34, kazu rekuperadu na’in 24 no total kazu ativu ne’ebé baixa iha sala izolamentu hamutuk na’in 461.

Husi kinta horiseik mai ohin loron sesta ema ne’ebé halo teste PCR iha Laboratorium Nasional Saúde hamutuk 632, inklui 223 testes ba ema ne’ebé halo pedidu atu hetan autorizasaun esepsionál hodi sai husi serka sanitária iha Munisipiu Dili.

Total pedidu autorizasaun esepsionál atu sai husi serka sanitaria iha Munisipiu Dili, horiseik loron 1 fulan Abril, hamutuk hotu 167. Sekretariadu SIJK responde kedas, 24 pedidu la prienxe kriteriu tuir resolusaun Governu.

Rui kontinua informa ba públiku katak Kazu grave 1 ho moderadu na’in 3 iha fatin Izolamentu Vera Cruz, kontinua hatan atensaun husi ekipa medika. Sira nia kondisaun estável.

No kazu moderadu 2 hahu halo mobilizasaun no ezersisiu Fiziku.

SIJK nafatin apela ba komunidade iha fatin ne’ebé maluk sira rekuperadu sira hela bá, favor labele tauk, labela halo diskriminsaun ba sira, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk.

Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona:

▶️Uza máskara

▶️Fase liman beibeik ho sabaun ka dezinfetante ruma

▶️Evita kose liman ba matan, inus ho ibun

▶️Wainhira kumprimenta malu, lapresiza ka’er liman, bensa-liman, rei-malu ka haku’ak malu

▶️Evita halibur malu barak

▶️Hamriik ka tur dook husi ema seluk, mínimu metru ida ho balun.

Jornalista: Saturnina da Costa

Editor: Jose Sarito Amaral

Read 849 times
Rate this item
(0 votes)