Prezidente Komisaun Nasionál Eleisaun (CNE), José Belo esplika atividade Partidu Politiku (ParPol) nian: konsolidasaun no kampaña. ParPol hala’o konsolidasaun hodi haforsa estrutura organizasaun, enkuantu kampaña foin akontese iha tempu eleisaun, loron 30 molok votasaun, ho objetivu atu hato’o programa partidu nian ba votante sira.

“Konsolidasaun tenke ba hato’o de’it buat ne’ebé ligadu ho sira-nia estrutura iha nivel Munisípiu, sira la halo kampaña, tanba ne’e mak kuandu sira halo liu perturba mós orden públika.Ha’u hanoin Polísia mós bele hanoin atu hola medidas,” dehan José bainhira halo audensia ho Komisaun A Parlamentu Nasionál kona-ba Lei ParPol, Sesta (20/02).

Nia destaka mós kestaun disiplina membru partidu nian.Nia nota katak membru partidu barak mak nafatin envolve iha asaun sira ne'ebé la tuir regra, hanesan marxa ka atividade sira ne'ebé perturba orden públika.

Tuir José, lider partidu sira tenke halo monitorizasaun no garante sira-nia membru kumpre lei hodi evita sansaun sosiál ka estraga partidu nia reputasaun.

CNE rasik seidauk iha autoridade esplísita atu regula atividade partidu nian durante períodu konsolidasaun, maibé bele fó fiskalizasaun no rekomendasaun morál ba lider partidu sira.

Tuir nia, importante atu partidu sira komporta ho profisionál, modernu, no ho dixiplina hodi mantein imajen pozitivu iha futuru.