Prezidente Komisaun Nasionál Eleisaun (CNE), José Agostinho da Costa Belo informa, iha proposta OJE 2023 CNE propoin orsamentu millaun $10,270,722.
"Orsamentu ba CNE millaun $10,270,722, maibé ba loos CNE millaun $4, millaun $6 subvensaun partidu polítiku sira," dehan José iha Parlamentu Nasionál, Segunda (10/10).
Relasiona ho eleisaun parlamentar iha 2023, Prezidente CNE ne’e dehan, sira-nia parte mós husu orsamentu adisional.
Tuir nia, CNE propoin orsamentu refere hodi utiliza ba rekrutamentu ofisial sira iha sentru votasaun no estasaun votus nune’e bele garante eleisaun Parlamentár la’o di'ak no transparénte.
"CNE husu hela orsamantu millaun $2.3 oinsá atu halo rekrutamentu ba ita-nia ofisiais sira iha sentru votasaun ho estasaun votus sira atu nune'e bele garantia eleisaun la'o di'ak, tanba partidu barak ke laiha kondisaun atu bele iha fiskais. Entaun CNE iha atu garantia supervizaun ne'ebé di'ak, lori Timor sai demokrásia ne'ebé mak tuir ita-nia mehi, presiza aumenta osan," dehan nia.
Iha fatin hanesna, Prezidente Komisaun A, Joaquim dos Santos hatete, CNE presiza osan uitoan atu reforsa iha servisu eleitorál.
"Sira presiza tán millaun $2.5 atu rekruta funsionáriu kontratadu sira atu halo servisu iha eleisaun 2023 atu akompaña no halo supervizaun iha eleisaun, maibé osan ne'e la mosu iha sira-nia orsamentu ne'ebé sira husu se bele governu konsidera ida ne'e, maibé ita sei diskute, se governu aseita, ita aprova, tanba depende iha administrasaun públika," dehan nia.
