Embaixadór Timor-Leste ba Brunei Darussalam, Abel Guterres informa, nia hamutuk ho delegasaun Zemancartel Berhad Group no Timorense Manpower Agency (TMA) husi Brunei hasoru-malu ho Primeiru Ministru Taur Matan Ruak kona-ba interese empreza husi Brunei atu investe iha TL no rekruta Timor-oan ba servisu iha Brunei.

"Ohin ho delegasaun mai husi Brunei ne'ebé ami koalia ho Primeiru Ministru kona-ba oinsa bele halo investimentu iha Timor-Leste no mós esplika kona-ba oinsa mak atu lori ita-nia oan, joven sira, ba serbisu iha Brunei Darussalam," dehan nia hafoin hasoru PM Taur, iha Rezidensia ofisial Xefe Governu, iha Farol, Segunda (22/08).

Nia hatutan, tanba sei iha prosesu nia laran nune’e nia parte lakohi koalia buat barak ba públiku.

"Ita hein katak fulan hirak tuir mai no tinan sira tuir mai serbisu bele lao par halo investimentu ne'e lao no ita-nia oan sira mós bele ba halo serbisu iha Brunei," nia dehan.

Aleinde ne’e, hafoin hasoru-malu ho PM Taur, delegasaun husi Brunei ne’e hasoru-malu mós ho Prezidente Repúblika, José Ramos Horta.

Hafoin hasoru-malu ho PR Horta, embaixadór TL ba Brunei ne’ebé lori delegasaun ne’e hatete, empreza Brunei hakarak mós atu investe iha TL.

Nia dehan, empreza sira hakarak atu kria industria oioin hanesan fabrika, turizmu, otel, restaurante, suku roupa no seluk tan.

Kona-ba, Timoroan na'in hira mak atu ba servisu iha Brunei, Embaixadór dehan, ida ne'e sei prosesu, bainhira aviaun mai foti sira mak foin ko'alia.

Maibé, importante, nia hatutan, ema ne’ebé atu ba servisu iha Brunei tenke asina ona kontratu mak foin sai.

"Ita sei tetu halo didi'ak atu sasán hotu la'o di'ak, ne'ebé ajensia sira ne'ebé atu lori ita-nia ema ba tenke kuidadu sira to'o sira ba iha Brunei tinan rua fila fali mai laiha problema," hatete nia.

Entretantu, PM Taur no PR Horta apresia ho inisiativa di’ak husi empreza sira husi Brunei Darussalam.