Tuir Reprezenta Autoridade Munisipiu Dili, Antonio Moniz Klau, informa, ho apoiu Governu nian liu husi Ministeriu Administrasaun Estatal (MAE), bele konstrui sede suku ne’e.
"Ohin ita mai iha ne'e atu asisti inagurasaun uma ba povu (sede-suku), purtantu ha'u fó sai uitoan servisu Munisipiu Dili nian, ne'ebé durante ne'e esforsu hahú kedas husi 2019 ita halo kontrusaun ba sede suku sira," dehan nia liu husi diskursu, iha Sede Suku Akadiru-Hun, sesta ne’e (12/08).
Nia hatutan, iha tinan 2019 Autoridade Munisipiu Dili konstrui ona sede suku Manutelolau iha Metinaru, sede suku Manleu no mós sede suku Madohi, Bebonuk no seluk tan.
Ho nune’e, iha tinan 2022 Autoridade Munisipiu Dili konstrui tan sede suku iha Akadirun-Hun.
Tanba ne’e, ho sede suku foun ida ne’e, bele ona fasilita Autoridade Lokal sira hodi halo atendementu ba komunidade sira.
Reprezentante ne’e, ne’e mós husu ba Xefe Suku, Konsellu Suku sira no mós komunidade sira atu kuidadu sede suku refere, nune'e bele uza ba tempu naruk.
Iha Fatin hanesan, Xefe Suku Bidau-Akadirun-Hun, Juvinal da Conçeição, hato'o agredese ba Governu liu husi Autoridade Munisipiu Dili, ne'ebé harii ona sede suku foun, hodi bele fó atendementu ba komunidade sira.
Autoridade Lokal ne’e, akresenta, maske inaugural ona sede suku refere, maibé nia triste tanba fasilidade hanesan meza, kadeira no armari laiha.
"Ho nune'e, ohin ha'u hato'o ona ba Autoridade Munisipal Dili, atu bele submete ha'u nia rekomendasaun no preokupasaun sira liga ba fasilidade hodi bele lori mai," nia relata.
Entretantu, konstrusaun sede suku foun ne'e, iha kuartu ha'at, fahe ba kuartu ida ba PAX, kuartu ida ba Xefe Aldeia, ida ba Xefe Suku no seluk ba Konsellu Suku sira.
Nune’e, orsamentu ba konstrusaun refere ho montante dolar amerikanu rihun $52.
"Ha'u nia esperansa hamutuk ho komunidade sira oinsa bele tau matan ba sede suku foun ne'e, no kuidadu bele uza to'o ba futuru oin mai", nia espresa.
Enkuantu, suku Akadiru-Hun iha aldeia tolu hanesan, Aldeia Nuu Badak, Bidik, Kuluhun de Baixo, ho total populasaun hamutuk rihun 3.845 ho xefe familia hamutuk 235.000.
