Sexta, 25 Juñu 2021 | Login
Ema ho defisiensia simu vasina iha salaun ADTL. Foto: saturnina/Independente. Ema ho defisiensia simu vasina iha salaun ADTL. Foto: saturnina/Independente.

Atual Vasinasaun: Ema 93,525 Simu Ona Vasina Faze Dahuluk Featured

DILI: Ema na’in 93,525 iha Timor-Leste simu ona vasina AstraZeneca faze dahuluk.

Vise Primeiru-Ministra no Ministra Solidariedade Sosiál no Inkluzaun, Armanda Berta dos Santos ho ekipa sira husi  Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra Covid-19, kuarta ne’e (09/06), aprezenta ba Konsellu Ministru pontu situasaun ba ezekusaun planu vasinasaun.

“To’o loron 8 fulan-juñu, ema hamutuk 93,525 iha teritoriu Timor-Leste mak simu ona vasina dozes dahuluk hodi kontra Covid-19, ne’ebé reprezenta pursentu 12 (12%) husi populasaun ho tinan 18 ba leten,” dehan Ministru Prezidensia Konsellu Ministru, Fidelis Leite Magalhães, iha Ministeriu Finansas Aitarak-Laran, Dili.

Nune’e, iha Munisipiu Dili mak afetadu liu ba surtu Covid-19, tanba ne’e, dozes dahuluk fó ona ba ema hamutuk 80,948, ne’ebé reprezenta pursentu 40 (40%) husi populasaun ho tinan 18 ba leten.

Enkuantu, iha faze dahuluk, hahú husi loron 7 to’o 28 fulan-Abril, Ministeriu Saúde distribui ona vasina ba ema hamutuk 28.412, iha faze daruak hahú husi loron 10-28 fulan-Maiu, totál ema hamutuk 48.170 mak simu ona doze dahuluk.

Nune’e, hahú iha loron 31 fulan-Maiu to’o loron 8 fulan-Juñu fó  ona 16.943 doze. Husi loron 10 fulan-Maiu to’o 5 fulan-Juñu, iha media, kada loron ema rihun 3 mak  simu vasina.

Aliende, Timor-Leste mós simu ona vasina SINOVAC rihun 100 ne’ebé oferese husi Xina no vasina AstraZeneca rihun 94.

Husi vasina AstreZeneca rihun 94 ne’e, rihun 24 fasilita husi COVAX Facility no rihun 70 oferese husi Governu Austrália.

“Hein katak fulan ida ne’e vasina rihun 100 sei mai tan, liuhusi mekanizmu COVAX nian no apoiu husi Nova Zelándia,”Fidelis informa.

Tuir planu, vasinasaun iha Munisípiu Dili sei kontinua fó doze dahuluk ba populasaun ne’ebé seidauk simu ho vasina SINOVAC no AstraZeneca.

Tanba ne’e, vasina ne’ebé mai tan husi COVAX Facility sei hahú distribui hodi kompleta ba populasaun ne’ebé simu ona vasina AstraZeneca iha faze dahuluk ba faze daruak nian.

Nune’e, sei kontinua distribui mós doze dahuluk iha munisípiu sira-seluk, sei fó prioridade liu ba sidadaun sira ho idade 60 ba leten no moras kroniku sira.

“Konsellu Ministru manifesta gratidaun ba apoiu sira hotu ne’ebé simu husi nasaun amiga no parseiru dezenvolvimentu sira ba akizisaun vasina nian,”tenik nia.

Governu mós deside katak, sei prepara posibilidade atu sosa vasina ba sidadaun sira ho idade 18 mai kraik no mós preve posivel nesesidade akizisaun vasina ba reforsu imunidade ba tinan 2022.

Entretantu, Primeiru Ministru apela ba membru sira Komisaun Interministeriál ba Elaborasaun no Koordenasaun ba Ezekusaun Planu Vasinasaun kontra Covid-19 atu intensifika implementasaun vasinasaun atu hasa’e média lorloron vasina ne’ebé atu fó.

Governu apela ba populasaun sira hotu atu partisipa iha kampaña imunizasaun, fatór ne’ebé sei determina ita atu bele ba fali normalidade.

 

Asistente Editor: Saturnina da Costa

Read 158 times
Rate this item
(0 votes)