Tuir observasaun husi Online Independente nota katak, apoiu hirak ne’e tula ho aviaun husi Malazia Kuala-Lumpur MY JET EXPRESS THE WAY TO GO, ne’ebé aluga husi OMS iha Timor-Leste.

Aviaun ne’e to’o iha Aeroportu Internasional Nikolau Lobato Comoro Dili iha oras 14:30.

Reprezentante OMS Dr. Arvind Mathur iha Timor-Leste hatete,  ekipamentu ba prevensaun Covid-19 ne’e bele to’o lalais mai Timor-Leste tanba durante ne’e sira servisu hamutuk ona ho Ministériu Saúde (MS).

“Aviaun ida ne’e ohin tula material Covid-19 no apiou umanitárian ba vitima inundasaun sira ne’ebé akontese iha loron 4 fulan-abril 2021 foin lalais ne’e,”dehan nia iha Aeroportu Internasional Nikolau Lobatu, Comoro, Dili, segunda ne’e, (26/04).

Nia hatutan, material ba prevensaun Covid-19 ne’e mak hanesan, maskara, luvas no medikamentu seluk hamutuk 13 toneladas inkluindu sasan balu ne’ebé sei oferese ba vitima inundasaun," dehan Mathur.

"Apoiu hirak ne’e sei oferese ba Ministério Saúde hodi fasilita kombate Covid-19 ne’ebé oras ne’e dadaun númeru kazu  husi loron ba loron aumenta ba beibeik,"dehan Mathur.

Iha fatin hanesan, Ministra Saúde, Odete Freitas agradese ba apoiu hirak ne’ebé OMS oferese ona mai Timor-Leste no promete sei utiliza di’ak ba suportasaun Covid-19 hodi mellora servisu di’ak liu tan iha futuru.

"Apiou material Covid-19 sira ne’e Ministério Saúde mak halo proposta ba OMS iha semana rua liu ba, agradese tanba OMS nia intervensaun lalais liu no ohin material hirak ne’e bele to’o ona Timor-Leste,” dehan Odete.

Ministra Saude ne’e promete sei fahe maskara gratuita ba povu Timor-Leste hodi uza hodi bele prevene Covid-19 iha Timor-Leste.

Jornalista: Camilio de Sousa

Editor: Jose Sarito Amaral