Enkuantu, anin boot ne’e akompaña ho udan no rai lakan durante oras rua nia laran, hahú iha tuku 10 to’o 12 kalan, oras Timor-Leste.

Tuir vitima Çesar Gonsalves da Silva, husi aldeia Luliheni, Suku Bukoli, hatete, udan, anin no rai lakan ne’ebé tarutu makas rezulta aihun ida besik iha uma ne’e tohar no mós anin sobu kalen no sasan uma laran balun hetan estragus total.

Tuir nia, iha uma refere iha xefe uma familia na’in haat, total membru familia na’in 15 inklui bebe na’in tolu no idozu na’in ida.

“Hafoin akontesementu, ami familia uma laran no mós bebe na’in tolu no avo ba toba fali iha viziñu nia uma, tanba ami nia uma hetan estragus total,”dehan nia kuarta ne’e (22/12).

Nune’e, eskola ne’ebé hetan estragus, Kordenador EBF, Bukoli, Leonardo Martinho Lopes, hatete, dezastre naturais ne’ebé akontense rezulta sala eskola nian hitu mak estragus total, tanba anin sobu kalen sira hotu.

“Anin sobu kalen iha sala de aula hitu no mós edifisiu rua, nune’e sasan sira iha eskola laran hanesan livru, meza no kadeira hetan estragus hotu,”dehan Kordenador Eskola refere.

Tanba ne’e, Kordenador ne’e hatutan, sei halo relatoriu ba edukasaun munisipiu no nasional atu bele haree kondisaun eskola refere, atu nune’e tinan oin estudante sira bele utiliza ba prosesu aprendizajen.

Tuir nia, total estudante iha eskola refere husi primeiru to’o terseiru siklu hamutuk na’in 421, total profesores hamutuk na’in 14, kompostu husi professor permanente na’in sia no kontratadu iha na’in lima.

Iha sorin seluk,  Xefe Suku Bukoli, Terezinha dos Reis, hatete, nia rasik informa ona ba parte relevante kona ba akontesementu ne’e.

Tanba ne’e, nia husu ba Governu atu apoia emerjensia ba vitima hirak ne’e.

Asistente Editor: Saturnina da Costa