Enkuantu, eskola ne'e hari'i husi Forsa Navál-EUA ho prosesu kontrusaun durante fulan-lima (5).

Embaixadór EUA ba Timor Leste, Thomas Daley hateten, projetu ne’e hahú desde iha tinan 2009 no sei laremata ho ida ne’e, maibé sei kontinua ba bebeik hodi hadiak liu tan vida komunidade iha Timor-Leste.

Tanba ne’e, nia orgullo no agradese ba Governu no mós komunidade nia koperasaun durante implementasaun projetu refere.

"Orgullo no ónra bo'ot ida ba ha’u, bele marka prezensa iha serimónia ne'e hodi ko'a fita, agradese mós ba Governu RDTL no mós komunidade nia kooperasaun durante implementasaun projetu"dehan nia liu husi komunikadu ne’ebé Online INDEPENDENTE asesu, tersa horseik (21/12).

Iha fatin hanesan, Vise-Ministru MEJD, António Guterres mós orgullo no agradese bao bra Forsa Navál-EUA, tanba bele servisu ho fulan-laran hodi atinji rezultadu ne’ebé rápidu.

Tanba ne’e, Governante ne’e husu, Timor-Leste ho EUA nafatin kopera ho diak liu tan hodi aplika mós projetu ne'e ba eskola sira seluk iha teritóriu laran tomak.

Entretantu, Diretór eskola ESG Nú-02, Vila-Nova, Baukau, Pedro da Conceição Soares hatete, total sala aprendizajen hamutuk 25, sala estragadu 6 (Aat la uza), sala biblióteka 1, Sala IP 1, sala laboratóriu 1 maibé ekipamentu sira la funsiona ona.

Ho nune’e, totál estudante hamutuk 1.008 no totál manorin hamutuk  na'in 64, husi némeru ne’e, voluntáriu na'in 7, kontratadu na'in 4 no permanente iha na'in 53.

Nune’e, Diretór eskola ne’e kontente tanba bele rezolve ona problema balu ne'ebé durante ne’e sira enfrenta.

Tanba ne’e, husu mós ba MEJD atu koopera ho diak liu tan atu bele resolve mós sira nia preokupasaun hanesan moru eskola nian no kampu jogu bola.