Tuir Xefe Suku Kamea, Matos da Costa, hatete, komunidade sira iha suku refere, preokupa liu mak infraestutura bázika liu-liu kona ba bee-moos no estrada, tanba iha aldeia rua mak seidauk asesu ba bee-moos no mós estrada lubuk ida, ne’ebé komunidade sira la asesu ho diak.
"Ha'u hanoin komunidade sira nia preokupasaun barak liu mak saneamentu, nesessidade báziku ne'ebé sira persiza tebes no preokupasaun liu-liu mak bee-moos, ita bele dehan grave tebes, ita nia komunidade iha aldeia rua mak durante ukun aan sira la uza bee-moos ida, sira uza mak bee moris ne’ebé beia-ala sira uza," dehan nia ba Online INDEPENDENTE, iha knar fatin Sede Suku Kamea, segunda ne’e (20/06).
Nia hatutan, Komunidade sira sente, bee-moos ladun sufiente ba sira atu konsumu, tanba distansia husi bee-possu ba komunidade sira iha aldeia rua ne’e dook tebes ho kilometru 200, no balun liu ida ne’e.
Enkuantu, Suku Kamea iha aldeia 13 mak hanesan, Ha'as-Laran, Lases, Terminal, São Francisco, Bedois, Aidak- Behare, Lamalaek, Bubur-Lau, Caisabe, Lenuk, ku'un, Ailele-Hun, Ailok-Laran.
Husi aldeia 13 ne’ebé iha Suku Kamea, iha aldeia hitu mak rai tetuk no aldeia neen iha foho leten, entaun iha foho susar tebes atu asesu ba bee-moos. Nune’e, iha aldeia rua mak grave liu ba bee-moos durante okupasaun to’o agora.
Nia haktuir, komunidade iha aldeia rua ne’e, iha tempu udan sira konsumu deit udan-been, no uza mós uza hodi haris.
Maibé, kuandu tempu bai-loron sira ba kuru bee-moos ho distansia dook.
Tuir nia, komunidade sira ba kuru bee iha bee-possu dala ruma sai husi uma iha tuku 03:00 madrugada.
Aleinde, nia dehan, estrada balun mós governu interior halo hela to'o agora husik hela, sira kee no ateru deit maibé la uza alkatraun, tanba ne’e, iha tempu udan difikulta ba komunidade no estudante sira nia movimentu.
Enkuantu, ba kestaun ne’e, autoridade lokal, submete ona proposta ba parte relevante sira, maibé to'o agora seidauk iha resposta rona, no proposta ne’e konsidera ou lae.
"Tanba ne'e, ha'u haree kondisaun grave tebe-tebes, komunidade balun sira nia oan sira la eskola, susar oan ba eskola tanba kondisaun bee ne’e deit," nia relata
Tanba ne’e, autoridade lokal ne’e, husu ba governu atu bele fasilita bee-moos no estrada ba komunidade refere.
Entrentantu, tuir dadus estatistika 2015, hatudu populasaun iha Suku Kamea hamutuk ema na'in 18.000.
Husi númeru ne’e, total uma-kain hamutuk rihun 3.325.
