"Ita nia hakarak kandidatura sira tenke assegura paz no dame no estabalidade, ami hakarak kandidatura sira tenke maduru liu bainhira iha kampaña, labele insulta malu e koalia objetivu ida ne'ebé klaru atu dezenvolve rai ida ne'e, no atu hasa'i povo husi impase politiku ne'ebé ita hasoru tinan naruk", dehan Diretór Ezekutivu AHDMTL, Gaspar Afonso ba Online INDEPENDENTE hafoin partsipa iha forum dialago ne'ebé hala'o husi FONGTIL ho Kandidatu Presidente Republika balun, iha salaun CNE, Kolmera Dili, Sexta ne'e (11/2).

"Se ita hotu hakarak moris iha dame no paz nia laran,labele husik ema seluk moris hela iha diskrimasaun nia laran, hanesan ho ema difisiensia matan", nia relata.

Nia espera katak, bainhira Prezidente Republika ne'ebé eleitu, atu hadia povo nia moris no tau prioridade no seriedade ba Ema ho Defisiensia sira nia moris di'ak. Kandidatu Presidente Repúblika ne'ebé hakarak involve Ema ho Defisiensia iha tempu kampaña, tenke kria fatin no kondisaun atu labele hetan diskrimisaun iha ambitu kampaña.

Nia fundamenta, karik Ema ho Defisiensia ruma hetan diskrimisaun husi kandidatura sira iha tempu kampaña, parte AHDMTL sei halo kritiku maka'as ba aktu sira ne'e.

"Ita sei halo kritiku maka'as ba aktu sira ne'e, karik ita nia defisiensia matan no seluk tan hetan diskrimisaun…se de'it mak halo diskriminasaun, ami AHDMTL prontu atu falun kritika no prontu rekomenda hakerek karta ba kandidatura sira",tenik nia.

Enkuantu Ema ho Defisiensia Matan iha Timor-Leste total hamutuk 14.828 no husi numeru ne'e na’in 60 mak atu partisipa iha votasaun iha Munisipiu Dili.

Entretantu, Presidente Repúblika Fransisco Guterres Lú Olo dekreta ona loron kampaña, hahú iha loron 2 to'o 16 Marsu, no loron votasaun ba eleisaun presidensial sei hala'o iha 19 Marsu tinan 2022.

Asistente Editor: Saturnina da Costa