Segunda, 25 Outubru 2021 | Login
Ema ho Defisiensia simu vasina, iha salaun ADTL Maskarenhas, Balide, Dili. Foto:Dok. Ema ho Defisiensia simu vasina, iha salaun ADTL Maskarenhas, Balide, Dili. Foto:Dok.

ADTL husu MS Kria Estratejia Asegura EhD Asesu ba Vasina Featured

DILI: Diretór Ezekutivu Asosiasaun Defisiensia Timor-Leste (ADTL), Cesario da Silva, husu ba Governu liu husi Ministeriu Saude (MS),  atu kria estratejia ida diak, hodi bele asegura ema  ho defisiensia asesu ba vasina.

“Tanba sosializasaun ne'ebé halo la to’o iha area remotas sira entaun ema ho defisiensia barak iha area remotas ka iha foho  mak seidauk simu vasina”dehan nia knar fatin Maskarenhas, Balide, tersa ne’e (12/10).

Aleinde, ema ho defisiensia seidauk masimu asesu ba vasina tanba postu saúde vasina nian, sentraliza deit iha fatin sentru sira. Entaun ema ho defisiensia hasoru problema ba distansia, nune’e susar ba sira atu asesu ba sentru saúde sira  ne'ebé fornese vasina.

Enkuantu, iha area remotas mós menus Kontrolu, nune’e susar ba sira atu asesu ba transporte, tanba dala barak autoridade komunitariu la intende ema ho defisiensia sira ho diak, tanba ne'e mak taxa partisipasaun iha vasina menus.

Entretantu, tuir kalkulasaun ADTL nian, ema ho defisiensia ne’ebé simu ona vasina menus husi 50%, husi total ema ho defisiensia rihun 38 resin ne’e.

Tuir nia, husi munisipiu 12 inklui Rejiaun Administrativu Espesial Oekuse Ambenu (RAEOA), ema ho defisiensia partisipa iha vasinasaun  masimu liu mak iha Munispiu Dili.

Iha sorin seluk, Diretór Ezekutivu FONGTIL, Daniel dos Santos, husu ba Ministeriu Saúde atu mantein prezensa pesoal saúde iha sentru vasinasaun, atu bele asegura prevensaun impaktu negativu husi vasina ka liu husi konsultasaun antes vasina.

Tanba, Konsiénsia komunidade sira nia iha fatin vasinasaun hodi kumpre protokolu MS no WHO nian, hanesan uza maskara no distansiamentu sei menus.

Nia heteten, haforsa Koordenasaun entre lider sira ho komunidade no mós pesoál saúde sira, atu kontinua koordena no servisu hamutuk to’o baze, nune’e mós hasa’e koñesimentu lider komunitariu sira nian kona-ba maneira kampaña vasinasaun.

nune'e, presiza fó prioridade nafatin ba asesibilidade nune’e númeru partisipasaun ho ema ho defisiénsia iha vasinasaun aumenta.

 

Asistente Editor: Saturnina da Costa

Read 211 times Last modified on Kuarta, 13 Outubru 2021 16:11
Rate this item
(0 votes)